قصيدة تشرفت بإلقائها في حفل زميل عزيز
 

قصيدة قلتها في حفل الزميل بدر بن سعود العضياني قبل أسبوع بمناسبة تخرج أبن أخيه

سر ياقلم واكتب بيوت ثمينا
اليوم أنا مبسوط والبال طربان

عند الرجال اهل الوفا الطيبينا
ذوي سعود رجال نخوة وشجعان

ساعة دعاني بدر للحفل جينا
لنا الشرف نبا نبارك لذيبان

يستاهل التكريم رجل فطينا
قضى سنين العمر ناجح وفهمان

نقول بالتوفيق والله يعينا
نسأل ولي العرش تيسير وإحسان

في ليلة فيها الفرح مكتسينا
ممزوجة بالورد عنبر وريحان

والعود الإزرق من يسار ويمينا
غير الشحم والهيل بدلال رسلان

والثانية سلام يالحاضرينا
أجناب ولا من قرابة وصحبان

ياراعي الوقفات شهمن رزينا
عز الخوي يابدر ياطير حوران

إخواننا العضيان حق ويقينا
هل العلوم الطيبة عبر الإزمان

هل العزايم ماتخف وتلينا
رجال على الشدات طلقين الإيمان

وربعي بني مرشد دروعن حصينا
عندي على قولي دلايل وبرهان

كل القبايل نعم ياسامعينا
الله محييكم عدد وبل ودان

صل على محمد رسولن أمينا
والمعذرة إن كان موجود نقصان

صح لسانك
قصيدة جميلة جدا
شكرا جزيلا لك لـ إطلاعنا عليها
تقديري واحترامي ..,

صح لسانك ياعيسى
ونعم بك يابن مرشد ونعم بالعضيان
ومبروك للمتخرج وبالتوفيق له في حياته العمليه ومستقبل منير ان شاء الله
وصح لسانك على القصيدة الجزله المعبرة
لك تحياتي وتقديري

صح لسانك ياعيسى

والنعم بالمادح والممدوح

والله يوفق المتخرج في حياته العملية

ابيات جزلة تليق بالمناسبة

صح لسانك
لاهنت
يالقرم