واااااو الخاطره مالها نص ساعه والردود ثلاث صفحات كانت جالسه تقرى الردود وابتسامة الرضى على شفاتها ماتفارقها قرأت أحد الردود من مشرف الخواطر والنثر
((اختي خواطر كنتي ومازلتي وستبقين من أبرز الأقلام هنا بل بالشبكه العنكبوتيه ككل .. ولكن المنظار الأسود الذي تنظرين به إلى الحياه ..سيضائل بشكل أو بآخر من شعبيتك وجمهورك .. انتي ككاتبه مشهوره يجب عليك إحترام آراء قرائك وجمهورك وتلبية رغباتهم ..تقبلي نصيحتي ورأيي المتواضع ..أخوك .. المشتكي حبه))
تنرفزت وريف من الرد .. هو صح مشرف القسم بس مايحق له يتحكم بكتاباتي ..إقتبست الرد وردت عليه
((مشرفنا المشتكي..
نحن هنا بقسم الخواطر والنثر .. أي أنثر ما أشعر به وأسطر ما يجول بخاطري كيفما شئت .. ولست في برنامج مايطلبه المستمعون .. انا حينما بدأت بالكتابه قبل أربع سنوات لم أنشد الشهره .. ولم أطلب المتابعه من أحد .. كنت ولازلت أكتب شيئا أراه جميلا بنظري .. وعرفني الجمهور هكذا ... واحبني هكذا ..وهذه الخاطره التي لم يستسيغها ذوقك أكاد أجزم وانا لم أتجول بقوقل بعد ..أكاد أجزم بأنها قد نقلت لأكثر من منتدى ولم يمضي على وقت نزولها إلا نصف ساعه .. شكرا أخي على النصيحه التي لم أقبلها ..أختك خواطر ))
ارسلت الرد وهي تحس ببعض الراحه يوم تنرفزت على هالغبي مسوي نفسه فاهم اففف.. فتحت صفحة قوقل جديده وسوت بحث عن عنوان الخاطره ولقتها منقوله بأربع منتديات إبتسمت وسمعت صوت أمها ينادي :وريــــــــــــــــــف.. وريـــــــــــــــــــــــــــف يمه
وريف فتحت الباب بسرعه وراحت تركض لأمها : سمي يمه؟
ام وريف: يمه علامك لي ساعه اناديك
اخذت وريف يد أمها وباستها : سامحيني يالغاليه بس والله ما سمعتك
ام وريف : مسموحه يا بنيتي .. وراك ماتعشين وانا أمك
وريف تذكرت كلام زوجة خالها اللي سد نفسها عن الأكل : لا يمه شبعانه الحمد لله
ام وريف بنظرة شك : متأكده إنك شبعانه؟
وريف اللي مستحيل تبين لأمها ضيقتها : أكيد يمه متأكده
ام وريف : زين يابنيتي بغيتك بموضوع
وريف ابتسمت وإجلست عالكرسي المقابل لأمها : امريني عيوني لك
ام وريف : تسلمين لي .. بس بغيت اقولك ان سلطان ولد جارتنا ام سلطان
وريف : ايه اعرفه وش فيه؟
ام وريف : وش رايك فيه
وريف عقدت حواجبها : زين بس وش فيه
ام وريف بإبتسامه : خطبك اليوم من خالك
تغير وجه وريف تغيرت حالتها كلها من نظرة عيونها لرعشة يدينها : لا لايمه مو موافقه
ام وريف : ليش يا بنتي؟؟ توك تقولين زين
وريف بدت تعصب : زين لنفسه ماهو لي .. وبعدين قلت لك ما ابي اتزوج
ام وريف : يمه اللي صار ماضي وخلاص
قاطعتها وريف اللي دموعها غطت عيونها : يمه كم مره اقولك لا تفتحين هالموضوع
ام وريف : والله ودي افرح فيك واتطمن عليك قبل اموت
وبكت ام وريف
وريف اللي دموعها خانتها : بسم الله عليك يمه عسى يومي قبل يومك .. وبعدين انا بتخرج واتوظف واشتري بيت ونطلع من هنا وعد يا يمه وعد أغنيك عن الحاجه ..
وراحت تركض لغرفتها.. قفلت على نفسها الباب وحضنت مخدتها وبكت ..
’,
’,
’,
فيصل اللي كان لابس نظارته وكان يقرى بحماس
عبد العزيز : ههههههههههههه شفت شكلك انت وانت تقرا؟؟
بس فيصل مارد عليه ..
عبد العزيز: هييييييييييييييه فيصل
فيصل بعدم انتباه : هاه
عبد العزيز : إش عندك ؟؟
فيصل : خواطر نزلت خاطره جديده
عبد العزيز : من خواطر؟؟
فيصل : خواطر مكسوره اللي بالمنتدى
عبد العزيز : ياااااااااااااااغث دم ذيك الانسانه تحسها معقده نفسيا
فيصل : احس وراها سر بحياتها
عبد العزيز : الا قول مريضه نفسيا
فيصل : تصدق على كثر هالشباب اللي يتلزقون ماتعطيهم وجه
عبد العزيز : بلا مابه أحد يعرف لها
فيصل : اقولك اشكال والوان بس ثقيله
عبد العزيز : يمكن انها ولد
فيصل : بالله عليك كل هالمشاعر تطلع من ولد؟؟
عبد العزيز بعد تفكير : وش لي إذا جبت راسها؟؟
فيصل بوناسه لان عبد العزيز اذا بغى شي جابه: لك اللي تبيه
عبد العزيز: اللي أبيه؟؟؟
فيصل يأكد : اللي تبيه
عبد العزيز : تم
فيصل : كفوووو
كان سلمان توه واصل من العمل ..
سلمان غير متزوج عمره 33 سنه ابوه توفى من هو 6 ابتدائي وهو اكبر اخوانه كانو يسكنون بشقه ايجار ماكان عندهم أحد يصرف عليهم اختار انه يدرس ويشتغل لين اغتنى واغنى اهله معه وبعد ماتخرج من الجامعه صار يشتغل بدوامين ..
سلمان: السلام عليكم ورحمة الله وبركاته
ام سلمان: ياهلا والله بهالوجه
سلمان ابتسم غصب وهو تعبان : هلا بك يمه وشلونك اليوم؟
ام سلمان: بخير ياجعلك بخير ((وتنادي الشغاله)) ياسونيا .. سونيا حطي العشاء يالله
طلت فجر مع باب المطبخ مبتسمه : وش حاجتكم لسونيا وفجوره موجوده
سلمان: هههههه عسى الله لايحرمنا منها ان شاء الله
جات فجر وحضنت اخوها اللي تعتبره ابوها : شلونك
سلمان: بخير انتي اللي وشلونك؟
فجر : بخير وعزوز اتصل ويسلم عليك كثير السلام
سلمان: الله يسلمه .. انا ابي اتصل عليه بس انشغلت
ام سلمان: خلاص يايمه مره ثانيه ان شاء الله
سلمان: لالا بكلمه اللحين يمكن يبي شي محتاج شي
فجر: اوكي انا بروح احط لكم العشاء على ماتكلم عزوز
سلمان : طيب خلاص
طلع سلمان جواله واتصل على عبد العزيز
عبد العزيز: هلا والله
سلمان: هلا فيك يالغالي وشلونك يبه ؟
عبد العزيز : بخير عساك بخير انت بشرني عنك؟
سلمان: كلش مثل ماتبي .. كيف دراستك؟
عبد العزيز : ادعولي وان شاء الله ما اخيبكم
سلمان: تكفى ياعبد العزيز حط بالك على دراستك
عبد العزيز : يالغالي انا لو ما اشتهي ادرس بس اتذكر وش كثر تعبت معي عشان اكمل دراستي برا اطير طيران عالكتب
سلمان عيونه دمعت من الفرحه بأخوه: ههههههههه الله يوفقك.. اليوم فجر مسويه لنا العشاء
عبد العزيز: هههههههههههه عليكم بالعافيه
سلمان : تامر شي؟
عبد العزيز: سلامتك
سلمان: مع السلامه يبه
عبد العزيز : بحفظ الله
ام سلمان: هاه وشلونه ياوليدي؟
سلمان مبتسم: يقول ان شاء الله امتياز
ام سلمان ترفع كفوفها للسما : يااااالله جعلني افرح فيك ياسلمان
سلمان يضحك : ههههههههههه لا يايمه انا راحت علي خلاص عزوز وفجر وجوري هم عيالي الله لا يحرمني منهم ولا منك.. الا على طاري جوري وينها فيه؟؟
ام سلمان: العوبه زعلانه
سلمان: افاا من مزعلها؟؟؟
ام سلمان: تقول طفشانه وتبي تطلع وقلت لها مابه أحد يوديها
فز سلمان من مكانه: وانا وين رحت؟؟؟ يالله اليوم بنتعشا برا
فجر اللي كانت طالعه من المطبخ بالصحون سمعت الجمله وبخيبة امل قالت : وشهووووو
سلمان: فجوره
فجر زعلانه: خير
سلمان: بشاورك واللي تحكمين فيه يمشي زين؟
فجر : زين
سلمان: اختك زعلانه يصير لك نفس تاكلين؟؟
فجر: ايه يصير لي
سلمان:الزبده.. نتعشا برا واوديكم الملاهي واذا رجعنا تسهرون عالعشا اللي انتي مسويته
فجر : لا نتعشا من اللي انا سويته ثم نطلع
سلمان : ههههههههه موافق وامري لله
فجر ابتسمت لسلمان : الله لايحرمنا منك يارب
سلمان : ولا يحرمني منكم .. ابطلع لجوري
طلع سلمان لغرفة جوري واللي صممها سلمان وردي على ذوق جوري... وطق باب الغرفه مارضت تفتح .. طق مره ثانيه .. مارضت تفتح .. المره الثالثه تكلم : جوري يبه هذا انا
جوري بسرعه فتحت الباب وبنبرة زعل : اسفه احسبك فجر
سلمان: وحتى لو فجر اللي عند الباب عيب يايبه تسفهين الناس
جوري وهي زعلانه : طيب
سلمان: وش فيك زعلانه؟؟؟
جوري :سلومي تكفى جيب لنا سواق
سلمان: الف مره قلت لكم سواق لا انا مستعد اوديكم لكل مكان بس سواق لا
جوري: بس انت تتعب مره
سلمان: اهم شي انتو ترتاحون... وعلى فكره اليوم جاي على بالي اوديكم الملاهي بس بشرط
جوري والوناسه مبينه بعيونها: وشهو؟
سلمان: تنزلين تتعشين معنا
جوري: موووووافقه
سلمان يضحك : هههههههههه يالله اجل ننزل
’,
’,
’,
الساعه 2 ونص الظهر ببريطانيا .. عبد العزيز اخر سنه له وياخذ الشهاده ويرجع السعوديه يحس انها ثقيله وصعبه رغم انه متفوق فتح باب شقته اللي يسكن معه اصحابه فيها الشقه كانت عباره عن 3 غرف وصاله .. عبد العزيز طالع باللي بالصاله شاف هيثم ومعاه بنت امريكيه.. عبد العزيز اللي عصب وتكلم بالعربي: هيثم وش جايب هالزباله هنا؟؟؟؟
هيثم: بشويش لاتصرخ طيب شفيك ياخي
عبد العزيز : من هذي؟؟؟؟
هيثم : خويتي ياخي وش فيك؟
عبد العزيز : هيثم برا شقتي سو اللي تبي .. خربط على كيفك .. لكن هنا التزم لو سمحت
هيثم : الله واكبر يالعاقل..
عبد العزيز : الدعوى مو دعوة عاقل ولا مهبول .. الدعوه دعوى انا جايين ندرس مو نخربط احيان نستهبل بس ماتوصل لهالدرجه
هيثم : والمطلوب اللحين؟؟
عبد العزيز يناظر للبنت بقرف : اطرد هذي برا والحقها اذا مايرضيك كلامي
هيثم سحب البنت وطلعو برا .. عبد العزيز عارف انه بيرجع ولازم يتكلم معه زين ويتفاهمون عالحدود اللي مالازم احد يتعداها بهالشقه .. حط عبد العزيز لاب توبه وكتبه واغراضه عالطاوله بس شاف شي خلاه يجمد ... اكواب وجنبها ثلج ... قرب الكوب وشمه .. ريحة خياس .. حسبي الله عليك ياهيثم خمر في شقتي .. عبد العزيز راح لغرفة فيصل يصرخ: فيييييييييييصل فييييييييييصل
فيصل اللي توه صاحي من النوم : همممممم
عبد العزيز : شف الحقير صاحبك بنات وخمر بالشقه
فيصل : هااه؟
عبد العزيز : هوا .. اقولك قوم اتصل فيه قول له شقتي تتعذره هذا اللي ناقص
فيصل: خلاص هات تلفوني انا اكلمه
رجع عبد العزيز وهو معصب من هيثم بعد ما تأكد ان فيصل كلمه .. دخل فيصل على عبد العزيز بالصاله وهو يشبك النت وحط فيصل الفطور قدامه
فيصل : هاه وش صار على خواطر؟
عبد العزيز : من خواطر؟
فيصل : خواطر مكسوره
عبد العزيز : أيــــــــــــــــــــه للحين ما سويت شي
فيصل : عزوز وش تبي تسوي؟
عبد العزيز : ابجيب راسها اللي ماقدرتو تجيبونه وبعدين خلاص
فيصل بخوف: وش اللي خلاص؟؟وبعدين إنسى سالفة هالبنت خلاص ياخي دراستنا أهم
عبد العزيز وابتسامته اللي تميزه على جنب وحاجبه مرفوع : ماخلقت اللي تستحق إحترامي وتشغل وقتي .. انا قلت لك بس بجيب راسها وخلاص
فيصل : تكفى يالواثق هههههههههه كني اشوفك تجر أذيال الخيبه ههههههههههههههههه
عبد العزيز : تتريق انت ووجهك ..
وسكت شوي وضحك: ههههههههههههههه جاتني فكرره
فيصل : وش هي؟؟
عبد العزيز : تعال جنبي وبتشوف بنفسك
دخل عبد العزيز المنتدى اللي هو مسجل فيه اساسا وسجل بإسم جديد وارسل رساله لخواطر مكسوره
بهالوقت كانت وريف منفخه عيونها من كثر البكا .. الجرح رغم مرور عليه 4سنوات بس هو لازال مفتوح وأي رشة ملح تزيد المواجع ..
قامت وضت وصلت الفجر وتجهزت للجامعه وبقى معها نص ساعه على ما زياد ولد خالها يجهز ويوديها هي وشادن للجامعه
فتحت النت فتحت المنتدى وسجلت دخول.. لقت رساله خاصه من وحده إسمها أسيرة الذكريات عجبها النك بالحيل فتحت الرساله
((السلام عليكم اختي خواطر .. أنا بصراحه وحده من المعجبين بكتاباتك الروعه .. وسجلت بالمنتدى بس عشان أشكرك خصوصا على اخر خاطره اللي أمس نزلتيها تسلم يدينك لاعدمناك .. بس انا عندي مشكله وابي آخذ رايك لأنك قدوتي بالكتابه .. أنا أبي أألف كتاب بس ما ادري اذا كتاباتي تصلح للنشر او انها غباء..
اذا ماعندك مانع هذا ايميلي))
ترقبوا الجزء الثاني
________________