09-01-12, 11:12 PM
|
|
|
جبروت رجل وصبر إمراه ..!
السلام عليكم ورحمة الله وبركاته
هـ القصه يا زائره القصيم عن صبر الحريم على العرده 
وياكثر اللي صااابرات 
يقولون كلها عشر سنين بالكثير وتصير السعوديه مثل مصر 
لاحوتزن الرجل  لحقته زوجته بالزنوبه 
و يصير يتنافض لاشاف زوجته ويمشي عداااال 
***
في مدينه من مدن نجد
كان يعيش شاب كان له قيمه وصيت
وكريم ومحبوب من ربعه و أهله
شاف بيوم من الايام بنت جيرانهم وجازت له و تعلق قلبه فيها يبيها
وكلم أبوه و أمه يخطبونها له
لكن الام رفضت بشده
حاول الشاب يقنع أمه عدة مرات ولكنها كانت مصره على رفضها
زعل وترك الديره شهور عشان أمه تتراجع عن موقفها
لكن الام ما غيرت رايها و حلفت يمين ما ياخذها
مضت الاشهر ورجع الشاب لاهله ولقى محبوبته تزوجت
وجن جنونه وتلخبطت أموره ..
وبعد فتره
قالت له أمه أخطب لك أحسن منها
ولانه كان مكسور قال زوجيني اللي تبين
وبالفعل خطبو له بنت حلال أجوديه وطيبه وسنافيه ويتيمه الابوين
أخذها وهو ما يبيها فقط ليرضي والدته
لكن للاسف عاملها معامله قاااسيه
حط حرته بهالضعيفه
كان دوم يتطنز فيها
ويضربها ويحطم معنوياتها وفيه غل عجيب ناحيتها
و أمه ساكنه معهم كانت واقفه معاها و تصبرها
تعرف وش سبب أفعال والدها والزوجه كانت تجهل السبب
وظلو على هالحال قهر وضيم وإهااانه متكرره لهالزوجه
أمام الناس و أهله وأمام أطفالها
لكنها تحملت فووق ماتطيق وضغطت على نفسها كثيييييير ..
لانها يوم قالت له طلقني قال ماراح أطلق
ولما أصرت
قال أن طلقتك والله ماتشوفين عيالك لين يسوقون سيارتهم !
سكتت .. مكسورة جناح مالها حيله
وتحملت تقول ماأبي عيالي يكون خدم لزوجة ثانيه
سنوااات طويله وهي تخدمه وتخدم اهله تشتغل على الصامت
وصحتها تردت شوي ومع ذلك أستمرت تخدمهم
وبدال مايشكرها ويحن عليها ويخاف الله فيها
بالعكس صارت ماتلاقي منه إلا الاهانه والتحطيم والشتم
إما بسبب ومرااات كثيره بدون أسبااااب !!
دااارت الايام وتطلقت محبوبته
وطااار بسسسرعه لاهلها يقول أبيها وشاريها
ومن بعد هالتعب وتحمل هالاهانه والقهر جاها خبر زواجه
بوحده ثااانيه وضاااقت فيها الدنيا وماااتت قهر
عيت هالدنيا تضحك لها تيتمت وهي صغيره
وأخذت رجال جبار دمر نفسيتها و صحتها
وخاتمتها يتزوج عليها
جاء زوجها وقال لها بعطيك هالعماره رضاوه لك عن زواجي
رفضت وقالت ما ابيك ولا ابي فلوسك
لكن أمه راحت لها وهمست لها
يالغبيه هو متزوج متزوج خوذي العماره وخليها لك
محدن يضمن وش تسويبه دنيااه
أخذت صك العماره وهي دموعها أربع أربع
مالها غير ربها تشكي له همها وضيقها
وبعد زواجه زاد هالرجل في قهرها
صار بس مع محبوبته يطلعون ويتمشون
وصار الضحك وفلة الحجاج مع محبوبته وهي لها التكشيره والاهانه
وصبرت سنواااات على هالضيم والغبن
وكبرو عيالها
وسبحان الله ...
بيوم دخل ولدها الكبير ولقى ابوه يهاوش و يشتم أمه و أمه ساااكته
صرخ بوجه أبوه .. وقال .. لاعمرك ترفع صوتك على أمي
و أذا بترفع صوتك بيوم على أمي لا تلوم إلا نفسك
وقال يمه جهزي أغراضك بنطلع من بيت ابوي
وأسكن أنا وياك و اخواني ببيت ثاني
وقام ابوه يتهاوش معه ويقول لا تتدخل بيني وبين أمك
قال الولد
لا معصي هذاك أول يوم حنا بزارين ..
تنام كل هالسنين مرتااح وحنا دموعنا على خدودنا
من قهر نشوف امنا تبلعه بسبايبك
اليوم حنا لها والشر مايجيها
سكت الابو وحس ان الولد واقف مع امه
فخااف يخسر عياله
وخاف ينفضح بين الناس ويصير سالفتن لهم
وقال خلاص مافيه هواش واقعدو لا تطلعون
قال الولد من اليوم وطالع أمي ماتناديها إلا أم فلان
وتعزها وتكرمها ولا تثنى كلمتها بهالبيت
وافق الاب على مضض
وسبحان الله بدت أمورها تتيسر وتضحك لها الدنيا
و زوجها عقب ماهو يشوفها بطرف عينه من الحقران
صار يحترمها ويسمع كلامها و ينفذه
عيالها كبرو و توفقو بدراستهم وريحوها ..
وبناتها تزوجو وتوفقو ماشاء الله
وصارت سيدة البيت
والكلمه كلمتها والشور شورها
وزوجها صار يداري خاطرها يخاف عياله يقلبون عليه !!
سبحان من عزها و أكرمها
بعد الضيم والقهر والاهانه
|