لما كان عمري خمس سنوات ، كنا بحفل زفاف
وبنص الرقص فضوا المنصة عشان ترقص أخت العريس لوحدها
كانت بعمري
انا ببراءة الأطفال دخلت برقص
فجت الطقاقة طردتني بالعصى قدام الناس
وبعض أهلها نطوا علي يعني اطلعي
وقتها حسيت بخجل شديد وشعور صعب جدا ً جدا ً
لدرجة اني جلست خاملة ورى وبطلت ألعب او حتى اتكلم
كأنه مسكوب علي ماء حاار
حتى إن حرمة كبيرة شافت الموقف واستاءت
قالت لو مدخلين هذي أحلى من اللي ترقص "ذمت شكل فيها"
طبعا ً انا بطفولتي ماكنت عايشة عند امي
وبهذا الموقف ماكانت امي قريبة ابكي عندها وتراضيني
جلست ساعة اكل نفسي بنفسي ، ولوحدي جالسة
ابتعدت عن الناس ، وابعد عبرتي بصعوبة عشان مااحد يشوفني
واشوف صديقتي من قريباتي تروح وتجي لأمها
لما شفتها جالسة جمب امها رحت وجلست جمب امها مع الجهة الثانية
قلت لامها انا ماابغى اروح زواجات ابد ، قالت ليش
وابكي واقول لها السالفة
وتضمني وتقول انا اوريك فيهم بهاوشهم مايستحون
وهم غيرانين منك لانك حلوة وهم لاء
طبعا ً تقول هاالكلام عشان ترضيني كطفلة
والا ماراح تهاوشوهم ولا عليها منهم ،،
بعدها تحسن شعوري وحسيت بثقة وانتعاش وجلست اتبسم
وقمت ألعب وارجع طبيعي
وضلت طول اليوم تتضحك معاي وتحاول تضحكني
كان هذا الموقف الأول اللي عرفت فيه إن الأمومة تقدر تعطيها كل طفل حولك بحاجة لها
مش بس اطفالك
مو شرط يعيشون كل أطفال العالم عندك
بس تعطيهم الأمومة بموقف ، بكلمة ، باحساس ، بضحكة ، بحب
ماتدري كيف تأثيره عليهم ،،