07-07-09, 10:56 AM
|
|
تروح على الخمر والحريم..الكل يشكي منه في الحاره أخلاقه فاسده ولا يحترم أحد
مايهتم فيني وأكثر من مره الاقيه يكلم بنات وأنا عنده يقولي هذولي صديقاتي وإذا مو عاجبك روحي بيت أهلك..ماكان ودي أروح لبيت أهلي وأصير مطلقه للمره الثانيه حاولت اسنعه بس ماقدرت كان قاسي يضربني أنا وولدي
جاء مره وقال نبي نروح للخارج ورفضت بس هو غصبني ورحت معاه بالغصب
كان بيروح هناك عشان الخمر المتوفر والحريم المتوفرات..وخذاني معه عشان متى ماصحى من سكره كمل علي..تخيلوا مره دخل علي خويه وبغى يعتدي علي لو ما الحارس موجود كان رحت ضحيته
وأول ماجاء قلت له وصرخ علي وقالي أن هذا رئيسه بالعمل المفروص ماعلمت عليه
قلت له يعني ترضى أنه يجيني قال:عادي حنا بدوله أوربيه وكل شي عادي
قعدت أبكي على حالي..وتذكرت "مطلق"وكيف كان يحافظ علي بس أنه سمعني أكلم طلقني لأنه مارضاها لنفسه..ضل يومين ماأدري وينه فيه؟؟ وأخوياه يطقون الباب علي وأنا أرتجف وأبكي ومقفله الباب ومااطلع
هنا قلت مالي إلا"مطلق" قلت يارب أنه يكون موجود دقيت والحمدلله رد
الو مطلق
إيه أنا مطلق أنتي أمل
وقعدت أبكي وأقوله الحقني
دقايق إلا هو يطق على باب الغرفه فتحت له وأنا أبكي تمنيت أضمه ..حكيت له كل إللي صار ...فار الدم بعروقه قالي اجمعي أغراضك ويله معي برجعك وأنا طالعه إلا أشوف أحمد راجع
شافني مع"مطلق"وهو إللي يتهجم عليه بيضربه ..وماقصر "مطلق"طقه طق لين ماصار دمه يملى المكان خذاني بسرعه ورجعني لديره..
رحت لأهلي وقلت لهم وش صار وثار الغضب فيهم وقالو من يرجع نبي نطلق منه
من بكرة رجع "أحمد"لديره وحاول يرجعني بس ماقدر رفض يطلقني واهلي يحاولون فيه بس كان معند وفي يوم مشؤم..طلعنا أنا والوالد بالسياره نبي نروح للمحكمه نبي نرفع قضية طلاق ..إلا تفاجئنا ب"أحمد" ورانا بسياره وكان مسرع ورانا..أبوي خاف وأسرع وهو إللي يحده يبي يوقفه بس أبوي خاف ولف السياره وانقلبت فينا
صحيت بالمستشفى على صوت الأجهزه وكنت كلي أجهزه دخلت علي الممرضه وسألتها عن أبوي..قالت أنه بخير ..دخلو علي أمي وأخواني وكانو يبكون ..طمنوني على أبوي أنه بخير سالوا الطبيبه عن حالي..وقالت الحمد لله لقينا كليه مطابقه لكليتك..فهمت منها أن كلاي ماعادت تشتغل وأني ضليت ثلاث أيام في غيبوبه وقاعدين يدورون عن كليه مطابقه لي لين جاهم واحد متبرع سووا العمليه على طول لأنهم خايفين على حالتي
الحمد لله نجحت العمليه بسلام وصحيت ألا أهلي كلهم عندي و"ياسر"ركض وقفز على فراشي وضمني..ياالله خفت أني ماشوفه..بصراحه كنت مستغربه ليش "مطلق"مو معاهم كنت أتوقع أول ماأقوم الاقيه قدامي
ضليت بالمستشفى فتره ورجعت للبيت ..وكانت المفاجأة مع أخوي ورقة طلاقي من "أحمد" ماتتصورون وش كثر فرحت أخيرا افتكيت من الكابوس آللي كنت عايشته
كنت اسأل عن"مطلق"طول الفتره وقالو لي أنه تعبان مره وماخذ أجازه من العمل
خلصت فترة العده..وأنا مستانسه حيل بفراق "أحمد"رحت وطلعت مع أخوي ومشاني أناو"ياسر"يوووه من زمان ماتمشيت سالت اخوي عن"مطلق"وقالي أنه مره تعبان وكله بالمستشفى
خفت عليه حبيت أزوره بس خفت من الكلام علي..في يوم من الايام دخل علي أبوي وكانت الفرحه بوجهه..قالي: أمل ..جاك خطيب .. استغربت أنا منهو إللي جايني قال:مطلق يا بنيتي
كأني بحلم ماني مصدقه معقوله أهلي خلوا الشور لي ماتدخلوا بشي بس أخوي كان رافض بشده
استغربت من أخوي قالي أن"مطلق" تعبان مره وكله بس بالمستشفيات وهو مايقدر على الزواج فيه خطر علي حياته دموع أخوي كانت تنزل وأنا بعد كنت مندهشه ودموعي تنزل محد قالي أن حالته بهالسوء..طلبت من أخوي أنه يخليه يجي ونسأله عن حاله
جانا من بكرة وكان وجهه مره تعبان خلانا أخوي أنا وياه مع بعض لحالنا ومعنا"ياسر"
سألني إذا كنت موافقه عليه سألته:إذا كان هو فعلا يبيني
جاوبني وقال:والله يا "أمل" ماذقت طعم السعاده من طلقتك صحيح كنت متسرع في قراري بس لحظة الغضب الواحد مايدري وش يسوي وكان أعظم خطئ بحياتي سويته هو طلاقك..حاولت أنسى ونقلت عملي بالخارج عشان أنساك بس ماقدرت وزواجك من"أحمد" كسر كل أمل كنت حاطه..والله تمنيت لك السعاده معاه بس للأسف طلع مايستاهلك وسويت المستحيل لين جبت ورقتك والحين يا"أمل"خليني أعيش مابقى من أيام عمري بحضنك وانسى إللي راح
أمل أنتي موافقه علي
دموع الفرح إللي على خدي جاوبته
سوينا الفرح عائلي وكان بينا"ياسر"ولدنا"
ذيك الليله من أروع أيام حياتي وأنا أقضيها مع أروع انسان بالدنيا قضينا طول الليله مانمنا كل واحد يطالع الثاني بحب والحب يحتوينا..تفاجئت وأنا أمسك شي في جنبه غريب ..فتحت المبه وشفت مكان عمليه في جنبه سألته بإستغراب عنها..ضحك وقالي:عادي بقلدك
هنا أنا شكيت أنه هو إللي تبرع بكليته لي وحلفته بالله وبعد أصرار..أعترف أنه هو من تبرع لي
ضميته بقوه وتمنيت مافكه قعدت ابكي على صدره وأعتذرله عن كل شي وهو مستانس ويضحك
حط رأسي على رأسه وقال: أمل أنتبهي ل"ياسر" وأنتبهي لنفسك
قعد يقولي هالكلام وكأنه يودعني سكته وقعدت أسولف له عن الأيام الجايه وش راح نسوي
بس كان يطالعني ودموعه تنـزل..صحيت الصباح وكان من أروع الصباحات في حياتي ولقيت مطلق صاحي قبلي والاقيه واقف عند السرير ينتظر أقوم .. قمت وبسته وكان وجهه مره تعبان..قالي أنه بيروح للمستشفى ويرجع قالي صحي "ياسر" بوديكم مكان مفاجئه ودعني وطلع وكان وجهه مشرق .. رحت وصحيت "ياسر"ولبسته وجلسنا ننتظر "مطلق"بلهفه وشوق هذا أول يوم نطلع فيه كلنا مع بعض..تأخر مطلق ساعه وساعتين وثلاث!! أدق عليه ومايرد
مادري شسوي أذن الظهر ماجاء وأدق على أهلي مايردون
ماهي إلا دقايق إلا يدخل علي أبوي كان وجهه يبكي قلبي عورني
سألته إذا أمي ولا أخواني فيهم شي ؟؟
قالي:يا بنتي أنتي مؤمنه بقضاء الله وقدره خليك قويه يابنتي
صرخت بصوت عالي: مين مين يا يبه
مطلق زوجك يابنتي عطاك عمره
اسودت الدنيا بوجهي...مات مطلق مات
قعدت أبكي وأصارخ زي المجنونه لا لا لا لا أبي مطلق لا لا لا
جوني أهلي حاولوا يهدوني بس فقدت عقلي
قاعده أقول:لا أصلن هو راح شوي وبيرجع حتى شوفوني أنا و"ياسر" لابسين
تكفى يبى رجعوه لي رح قله أمل وياسر ينتظرونك
عطوني مهدآت بس كل ماصحيت وتذكرته بديت أبكي وأصارخ
قلت لازم أروح وأشوفه وداني أخوي له ودخلت بغرفه صغيره بالمستشفى
شفته ممدد على سرير وكان وجهه أبيض ومنور ..قربت منه وأنا أرتجف وابكي
لاول مره أشوف منظره كذا كان ممد ولايتحرك كان منظره يخوف ضميته بقوه
أحاول أصحيه قلت يمكن أسوي معجزه وأصحيه بس للأسف كان جثه هامده
قعدت أحرك يده وأقول:مطلق شوفني أنا أمل حبيبتك بجنبك يله أنا وياسر ننتظرك يله قوم قوم
يوم شفته مايتحرك وأنا أصرخ بعالي صوتي~~~~مطلق~~~~......؟؟
راح مطلق راح أطهر قلب بهالدنيا راحت الضحكه بدنيا راح الحب راح الكرم
راحت الرجوله والوفاء راح الذي ماخلى وراه إلا الحزن والذكريات الحلوة
راح الذي طول عمري وأنا أبكيه راح مطلق وخلاني بهالدنيا لحالي
راح بس أهداني أحلى شيين بالدنيا ماأتكلم عن الفلوس وعن العمارات إللي ورثتها منه
أتكلم عن أروع شيين أهداني إياهم: ياسر ولدي ..وكليته إللي في داخلي
الكل بكاه من كبير وصغير وحضر العزاء ناس كبار جدا وناس معروفه بالبلد
الكل جاء وعزاني وسلم على ولدي رافع راسي حتى بموته الكل يدق تحيه لولدي
عرفت أنه بعد ماتبرع لي بكليته تعب لان كليته الثانيه ماتشتغل..خاطر بحياته عشاني
قدم لي حياته ورحل عن الدنيا هذا إللي تعبني حيل كل ماتذكرت تضحيته قعدت أبكي بحسره
قعدت فتره الحداد في بيتي ولقيت في يوم من الأيام رساله في درج وأكتشفت أن مطلق كاتبها قبل وفاته كان كاتب فيها:حبيبتي"أمل" أنا قاعد أكتب هالرساله وانا مادري متى بتقرينها كتبتها في صباحيتنا أنا يا أمل خلاص حالتي تعبت ومافيه أمل لشفائي أنا قدمت لك كليتي السليمه وضليت في التعبانه بس عشان أعيش معك مابقى من حياتي سعيد..بس حالتي سائت وعلاجي صعب ومابقي إلا أيام معدوده وأنتقل لرحمة الله تدرين أن هاليوم إللي عشته معك في حب وأشوف الحب في عيونك من أروع أيام حياتي خلاص يكفي هالشعور إللي عشته وأشكرك من كل قلبي على لحضات الحب إللي منحتيني إياها أمل تكفين أنتبهي ل"ياسر"ولنفسك تراني صحيح رحت عن الدنيا بس ماخليتكم كذا خليت لكم ثروه كبيره ماتخليكم بحاجة أحد حتى عيال عيال ياسر يستفيدون منها
وأعذريني يابنت العم إذا قصرت معك في شي واسمحيلي بالرحيل مع أن ماودي بس هذا حال الدنيا كلنا راحلين محبك الأبدي:مطلق
تمنيت إني ماقريت الرساله من قريتها وأنا ماتجف الدموع من عيني
قعدت شهور وسنين حاولت أنساه بس ماقدرت حيل تعبت
كل ماشفت ولدي ياسر وطالعت بعيونه تذكرت المرحوم
وتذكرت ضحكاته بعت الفيلا إللي كنت ساكنه فيها
لأني تعبت وأنا أشوف مطلق بكل زاويه البيت صار يخوف من بعده
فاقده ضحكاته رحت وعشت عند أهلي وفتحت مشاريع خيريه وسميتها للمرحوم
--------------------
هذي هي قصتي كلها وأتمنى من الجميع يستفيد منها..حبيت أقول لكل بنت..دوري على الشخص اللي يحبك وشاريك مو إللي أنتي تحبينه وترى الجمال مو أهم شي ..مافيه اجمل من"أحمد" إللي ماخلى وراه إلا كل ذكرى فاسده..محد يسأل عنه ولايسلم عليه وطى رأسي بالأرض بافعاله
ومطلق إللي مافيه جمال بس جماله داخلي شوفوا شلون عزني ودللني ورفع رأسي
حتى لأخر لحظه وأنا أشوف الطيارين والضباط يدقون لولدي التحيه
&م&
التوقيع
|
قال رسول الله -صلى الله عليه وسلم
من قال أستغفر الله العظيم الذي لا إله إلا هو الحي القيوم وأتوب إليه ، غفر الله لهُ وإن كان فر من الزحف "
...........
مــــن لايـفـكــر بـزعــلــي مــاهـــو مـفــكــر فـــــي رضـــــاي
ومــن شــح قلـبـه بـالـغـلا .. وشـعــاد لـــو كـفــه نـــدي
............
لاصد عنك من توده وجافاك ...خله وجازه بالجفا مثل صده....
خلك عزيز النفس والعز مبداك وكلن عطه تفصيل
ثوبه بقده خص الرفيق اللى اذا جيت
حياك وان غبت عنه ياصلك بالمودة
|
|