العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
أدوات الموضوع | التقييم: | انواع عرض الموضوع |
#21
|
||||
|
||||
أشكركم على هذا الجزء المشوّق.
ولكم احترامي وتقديري على جهودكم المبذولة في هذا القسم.
|
#22
|
||||
|
||||
ننتظر التكمله بكل شوق...
|
#23
|
||||
|
||||
!!*!!.. الحلقـــة السابعــــــه ..!!*!!
دخل خالد غرفته .. ومارد على ابوه وامه اللي مستغربين عدم رجوعه واختفاء عبير من البيت في هاحزه .. قفل الباب ..وانسدح على السرير ...آه يالدانه ..ياني متلوم علشان اللي صار لج .) طقات الباب القوية وصرخات ابوه وعصبيته خلته يخمن ان عبير قالت لهم كل شي .. تذكر ضاحي ..ماينسى رده الفعل عند الكل ..حتى هو اخترع ..كان ضخم ..ويهه خالي من كل وسامه ..خشمه كبير ..وعيونه كبار لدرجه الجحوظ ..وأسمر ..من الوهله الاولى تخترع من ويهه ....المسكين شكله انحرج وراح ... بعد المسرحيه اللي صارت ..... كان خالد بهالتصرف يحاول يشغل نفسه عن غضب ابوه ...غمض عيونه ومن الارهاق نام .. ************* رن جواله .. رد عليه وهو نايم .. عبير ــ خالد ..قوم دوامك .. خالد ــ دوام؟؟ ليش الساعه كم؟؟ عبير ــ دخلنا العصاري ..قوم .. خالد ــ زين .. صك التلفون ..وقام ..للحين بملابس امس ..الصبح الساعه ثمان رجع البيت...تسبح وطلع ..لبس ملابسه ..وشال اغراضه وطلع من الغرفة .. عبير ــ بروح وياك .. ماقال شي ..ركبت السيارة وهي مكتئبه ... عبير ــ ليش ماكليت لك شي؟؟ خلد ــ ما ابي .. عيون خالد كانت حمره وويها تعبان .. عبير ــ خالد ...ابوي عصب وايد .... خالد ــ ..................................... عبير ــ راضيه لا رجعنا ... خالد ــ شسوي؟؟ شتبيني اسوي؟؟ عبير ــ ما ادري ..بس اهم شي يرضى .. خالد ـ تدرين اني ما ابي اروح المستشفى؟؟ ما اقدر ..بس ضاغط على نفسي ..ما تعرفين اي شعور احس فيه الحين؟؟ عبير ــ خالد انت تحب الدانه ؟ خالد ــ ما احبها ..بس ما ..مو راضي عن نفسي انها ... عبير ــ حاس بالذنب؟؟ خالد ــ اللي احسه ..انه دانه ماتستاهل ..واني كان ممكن انقذها على حساب نفسي ..بس طلعت اناني ... عبير ــ من يومك كنت ااني ..مايات على هالسالفة بس ....تذكر البنت اللي يبتها؟؟ انانيتك خلتك ماتزور الدوحه طول اربع سنين ...علشانها ..امي المسكينه كانت ما تطلع من البيت في هالاربع سنوات ..يمكن تتصل وما تكون موجوده ..كل عيد أو مناسبه ..أمي تصيح دم ..مو كافيها ان بناتها بعاد عنها ..ووحيدها مايكلف نفسه اتصال .. خالد ــ عبير اسكتي عني كافيني اللي فيني .. عبير ــ طول امس وانا افكر في الدانه ..خالد ..أكرهك يا خالد ..اكرهك ..سببت العذاب لاغلى ناس عندي .. ماعلق خالد ..وطول الطريق تموا ساكتين ... *********** في المستشفى ... نايف ــ بيني وبينها ياقمر ثمان وعشرين سنه !! بينها وبين ثامر اللي هو اصغرنا خمسطعش سنه !! خفنا عليها ..لاننا مو من جيلها ..كنا نبي نزوجها وهي بنت خمسطعش ..بس اجلنا شوي .. قمر ــ مو عذر انكم ماخلينوها تشوفه ...وتقرر اذا تبيهه ولا لا .. نايف ــ انتي قلتي لها عن خالج ..ليش ما وصفتيه لها؟؟ قمر ــ به ..هذا خالي ..حلو في عيني ..اقصد اني تعودت عليه .. نايف ــ قمر ماني رايق لج ..بعدي عن طريقي .. خالد سمعهم هو وعبير ...اللي نزلت راسها ... طالع قمر ...اللي كانت معصبه علشان حالة عمتها ..بس لاحظ استهتارها في شيلتها ...غرتها طالعه كلها ...مخليتها طالعه جنان ..التفت لعبير اللي كانت حاطه الغشوة على ويهها .. ــ روحي داخل ... عبير ــ يلا قمر ..خلينا نروح لعمتج ... قمر كانت عيونها على خالد ..وقالت وهي سرحانه ــ نايمه ..طلعت من عندها توني ,, خالد نزل عيونه ,,,قمر ما احشمت ابوها اللي واقف ..بس ابوها كان سرحان هو الثاني .. راح داخل لعند الدكتور المسؤول ... ************************** بعد اسبوع .. حمد ــ عمتي انا اجرت شقه .. دانه ــ ليش؟؟ حمد ــ بتم وياج لين تتزوجين ..وما ابيج تظلين في بيت ابوي او اي حد من اعمامي .. دانه ــ بالعكس ..حريم اخواني الحين معاي احس من قبل بوايد .. حمد ــ ما يهمني ..اليوم بتطلعين من المستشفى للشقة .. دانه ــ حمود ما ابي اكلف عليك .. حمد ــ شو حمود هاذي؟ اصغر عيالج؟؟ يلا زين مافكيتي شنطتج ..خليت السواق اخذها للشقة ... دانه ــ مامداني ... دخل خالد مع الطبيب المسؤول عن حالتها .. خالد ــ ها دانه ..بتتركينا .. دانه ــ اووه ..خلاص تبيني اسكن هنا؟؟ خالد ــ شلون حالتج الحين؟؟ الطبيب ــ لا ماشاءالله عليها ..ايد متحسن حالها ...تحدت توقعاتنا وقامت بسلامه ...ولا حد ثاني كان تم شهر على الاقل في المستشفى .. دانه ــ مشكور ا دكتور ..ادري ازعجتكم وايد هالاسبوع .. الدكتور ــ لا .. شالكلام ..هذا واجبنا وأقل من واجبنا ..عن اذنكم .. خالد ــ عن اذنكم ... حمد ما علق بس الدانه اسرحت شوي ..اللي خلاها توقف على حيلها ايمانها القوي بالله ..ورضت بالي صار ..تذكرت كلام امها ..امشي ورا اخوانج ..مابقى لج غيرهم ....تمنت دانه لو انه وافقت على خالد لما كانت امها تزن على راسها علشان الخطبة تصير ...ودانه ترفض بحجة الدراسه ... (( خلاص ..ليش اتمنى شي خلاص انتهى؟؟ ليش اندم على كرامتي ؟؟ يمكن ضاحي يكون زين ومايهيني مثل خالد؟؟ مكن اعجبه؟؟ بس قمر قالت انه مو راضي ..او ما يبيني ..ما ادري شالكلمة اللي قالتها )) .. حمد ــ دانه ..وين سرحانه؟؟ دانه ــ ها ..ولاشي كنت افكر ... حمد ــ بنت اخوج هنا .. انتبهت دانه ان قمر واقفه جنبها .. قمر ــ نحن هنا ,,عمتي وين سرحانه؟؟ حمد طلع من دون مايستأذن ..يمكن استأذن بس دانه كانت مشوشه .. قمر ــ هذا ولد اخوج مايعرف الاصول ..ماعنده مذهب .. دانه ــ حدج عاد ...الا حمد يا قمر ..هاذا اغلى انسان عندي .. لاتغلطين عليه .. قمر ــ شفتيه ماسلم ولاسأل عن الحال .. دانه ــ وانتي شعليج منه ماكنتي تبين خالد؟؟ وبعدين شوفي ويههج ..حمد يخاف ربه ..وشكله استحى من هالميكياج اللي حاطته والغره اللي مطلعتها . قمر ــ عمتي ...انا كبرت خلاص ..وهالشي عادي .. دانه ــ شلون كبرتي خلاص؟؟ هذا اللي يسمونه عذر اقبح من ذنب ...المفروض تخافين الله وماتظهرين فتنتج ..لانج كبرتي .. قمر ـ بس ,, دانه ــ قمر ..عدلي شيلتج ..ولاطلعت حطيها على ويهج ..مايسوى لج هالذنوب اللي تآخذينها .. قمر ــ ............. دانه ــ شفتي خالد؟ قمر ــ اييه ..توه طلع من هنا ..ماطل في ويههي حتى .. دانه ــ لانه نفس حمد ..مايرضى اللي تسوينه ..وأبوج موجود ماله حق يسولف عليج .. قمر ــ زين عمتي خلاص صكي الموضوع ..ليش ماتيين البيت عندنا ؟؟ دانه ــ خلاص ..حمد تبرع انه يتم معاي يباني آخذ راحتي .. قمر ــ واذا ابي ازورج؟ وليلى تبي تزورج ؟؟ دانه ــ تعالوا الشقة .. قمر ــ ماظن ابوي يرضى .. دانه ــ ابوج سمح لاختج تسافر مع بنات خالتها مايسمح لج تزورين اخته؟؟ قمر ــ يمكن ..مو خايفه من النتايج؟؟ دانه ــ متى بتطلع؟ قمر ــ يقولون باجر .. دانه ــ مو مهم ..ما ظن خالج يرضى اني ادرس في الجامعه .. قمر ــ بالعكس ..خالي ضاحي يحب الدراسه ودايم يهاوشني ويا بدور ...لانا ماندرس .. دانه ـ خالج ..طباعه زينه؟؟ اخلاقه؟؟ قمر ابلعت ريقها وقالت ــ هو زين ..كخال .كزوج ..ماعندي فكره .. دانه ــ الزبده .. قمر ــ من بعيد لبعيد ..هو زين ..مايحتك وايد ويانا ..ريال له كلمته .. شخصيته قوية . حست دانه انه قمر شوي مترددة ...واتحاول تخبي شي عنها .. حمد ــ يلا عمتي .. دانه ــ الحين نروح؟ حمد ــ اييه ..الدكتور قال خلاص ..حالتج الحمدالله تحسنت ..جمعت اغراضج؟ دانه ــ من الصبح ..بس شنطتي الصغيره وجوالي ما ادري وين .. حمد ــ في السيارة .. يلا ... قمر ــ الدريول تحت..بروح انا ..مع انه كان ودي اساعدج.. دانه ــ لا ..ما يحتاي مساعده .. حطت قمر غشوة على ويهها ..ولاحظت دانه نظرات حمد ..كانه متلوم في شي ..سلمت على عمتها وطلعت .. حمد ـ هي مايات متغشية ؟؟ دانه ــ مدري ..ماشفتها لما يات ..بس شفتها لما اطلعت تغشت ..شقال لك الدكتور؟؟ حمد ــ ولاشي ..قال تريح اعصابها ..الهدوء ضروري لج .. دانه ــ اخوانك الحمير وينهم ؟؟ حمد ــ هذول وهم اكبر منج..حي تشتمينهم ..احترميهم شوي والله يكسرونج ..لا سمعوج . دانه ــ مايوني الحمير الا مرة وحده ..مب جني عمتهم ..صج سبال .. حمد ــ للشقة عمتي ..جدامي .. دانه ــ انت ضابط في دوامك بس مو علي ..يالزطي . .. حمد ــ ترا اردج بيت ابوي .. دانه ــ لا فديتك ..راضية في الشقة مالي خلق اشوف حد ..لا اخواني ولا حريمهم .. ********** انصدمت من الريحه الغاوية في الشقة .. ــ هممممممممم ...ريحة كباب ..اما اني اتحلم ولا صحيح .. حسن ــ حياج عمتي ..الريحه ريحه جبد الخروف ..بس ماعليج شويت لج معاه كباب ... سلمان ــ وانا سويت لج يش بتآكلين اصابعج وراه .. خالد ــ عمتي اليوم بتكشفين فوائد التخييم .. مشعل (ابن سعود 14سنه )ــ حمدالله على السلامة عموه ... صالح (ابن ثامر 13سنه ) ــ حمدالله على السلامه عمتي ... افرحت دانه عيال اخوانها محتشرين ومسوين لها استقبال .. داانه ــ الله يسلمكم ..كل هالاكل لي؟؟ (المطبخ مفتوح على الصاله ..والعيال حاطين سفره على طاولة الاكل ومشعل وصالح يتفنون في السلطات والعصاير ,.) تنحنح حمد ــ احم احم ..الدكتور قال عندج فقر دم شديد ..ولزم علي انج تآكلين وجبات دسمه يوميه ...عاد استدعيت الاسبشيلست تيم .. المتخصصين في التخمه ..وقلت لهم ابي عمتكم في اوج تألقها خلال ايام من الاكل الدسم والمفيد .. حسن ــ عاد الدكتور نصح بجبد الخروف ..شبه المطبوخ ..وقال مفيد جدا .. دانه ــ شبه مطبوخ؟؟ حسن ـ وشفيه ويهج جيه كأنج شميت ريحه خايسه ؟؟ اييه ..انتي تبين دم . ..ماعندج دم .. دانه ــ لا لا لاا عاد هذي سبه ..انا ماعندي دم ؟؟ حمد ــ عمتي ..لا تضخمين السالفه .. ابتسمت دانه .. ــ انا بس اغلس عليكم .. مشعل ــ انا وصلوح تدبرنا كل العصاير الطبيعيه والسلطاات... ************ الدكتور عبدالرحمن ــ آنسة دانه ... خالد ـ صارت مدام .. عبدالرحمن ــ مدامتك؟ خالد ــ لا ... عبدالرحمن ــ لا ...حسافه كنت مفكر اخطبها .. خالد ــ ؟؟؟ عبدالرحمن ــ لا ..لايروح ظنك بعيد ..بس اخلاقها ومؤدبه ..وشكلها حساسه وايد ..وانا ما بذكر جمالها .. لانك شايفه .. حسافه نادر ماتلقى حريم بهالصفات .. ماعلق خالد لانه حس ان عبدالرحمن انصدم بزواجها .....عبدالرحمن اللي ماعرفها الا هالاسبوع ..بس خالد يعرفها من زمان ...يمكن يظن انه يعرفها؟ يمكن ما يعرفها اصلا؟؟؟ افكاره تشوشت ..من اسبوع ابوه ما يكلمه ولا امه ..عبير زعلانه منه وهو نفسه زعلان من نفسه خصوصا لما شاف دانه رضت بنصيبها وتحسن وضعها الصحي .حس بذنب اكبر . |*********** حمد ـ وذابحيني الاسبيشلست تيم ...العيش ماصخ ما ينوكل ..واللحم مافيه ذرة ملح و لا مستوي عدل والسلطات ماعليها اي نكهه ..حتى الجبده اللي مسوينها تنزف دم ...والعصاير حاره مافيها اي سكر او ثلج . دانه ــ الاكل مافيه شي يا حمد .. حمد ــ اذا انتي في صفهم ..غصب عنج تآكلين .. حسن ميت من الضحك وسلمان منحرج وخالد رجع يشوي الكباب مرة ثانية مشعل وصالح منصدمين .. دانه ــ شفيك؟؟ اذا على الملح رشة خفيفة توزن الامور ..والكباب الحين يستوي والسلطة رشة ملح وزيت زيتون وسماق ونعناع وليمون وتصير احلى مايكون ..والحين بزيد على تتبيلة الكباب شوية ملح يضبط الطعم كله ..والعصير مكعبات ثلج مع سكر ..ماشي خربان يستاهل التهزيييئه ..بس عطنا ربع ساعه ... خالد ــ كلامج يبين سهل بس الفعل هو المطلوب .. ****************************** مثل ما قالت الدانه ..يبي للاكل تضبيطات بسيطه ..وبعد ماخلصت ..انصدموا بحلاة الاكل .. وهم ياكلون ...كان في سيخ كباب جدام دانه ....كانت دانه جوعانه صج لانها طول اسبوع على المغذي واكلات بسيطه ..اول ما مدت يدها للسيخ ..خذه حسن .. حسن ــ عمتي وراج عرس ..سوي ريجيم .. خالد ــ حسن ... الكل سكت ..ووقفت الاشواك ولاسكاكين عن الربشه ..قفط ويهه دانه .. مشعل ــ اوعدج دندون اني برقص لج في الدخله .. صالح ــ وانا بعد ..وبشتري سيف ارقص به عرضه .. سلمان ــ انا مابكون فاضي بيكون تركيزي على البنات اشوف الاشكال الحلوة .. حمد ــ انا بزفج .. حسن ــ وانا بسوق السيارة جنبج .. خالد باستسلام ــ وانا بكون مع سلمان .. ضحكت دانه ...وحست براحه ..وخذت السيخ من جدام حسن للي طالعها باستسلام ونزل راسه كانه نبيل في المسلسلات الاجنيبة ...وخلال ثواني ارجعت ربشة الاشواك والسكاكين .... دانه ــ ماقالوا لكم متى عرسي؟؟ حمد ــ سمعت طراطيش كلام انه بعد شهرين ... دانه ــ زين ..زوج المستقبل .. خالد ــ انا شفته وسيم وايد .. مشعل ــ اييه عمتي ..أنا انهبلت على جماله .. صالح ــ صدق عمتي ..طويل رزه وشخصيته قوية .. حمد ــ سمعته زينه وملامح ويهه مش بطاله .. حسن ــ ترتيبه في الجمال رقم سبعه ... حمد ــ اييه لا ركزتي فيه شكله احلى بوايد .. سلمان ــ خوش ريال ..يشبه حمد .. حمد لف على اخوه بعصبية ..حست دانه انهم كلهم كاتمين ضحكة عودة ي قلوبهم ..وشافت الغيظ في عيون حمد والابتسامة الخبيثة في عيون سلمان .. دانه ــ حمد ,,,رد عليه ...والله طلعتوا كذاااااااااابين .. وضحكت ...هم ماصدقوا خبر وانفجروا ضحك ...ولف حمد على سلمان وضربه على راسه بقوة ..وسلمان ميت ضحك ... حسن ــ أظن عمتي عرفتي ليش ابوي ملجج على ضاحي بسرعه ..ماكن يبيج تهونين .. خالد ــ والله لسانك متبري منك ..شالكلام؟؟ دانه ــ اعرف ..ماله داعي تقولون لي ..بس ادعولي تتسهل اموري .. حمد ــ الله يسهل امورج و يريح قلبج يا الدانه بنت حسن .. الكل ــ اللهم آمين ... دانه ــ لاتمدحونه جدامي مرة ثانية ...أنا شايفهه ويهه .. مشعل ــ عاد حنا بنكون في هالشقة معاج ليل نهار ...وحلى شي انه البحر قريب .. حمد ــ فجأة لقيتهم عازمين انفسهم .. كلهم يبون يعيشون هنا .. دانه ــ حر وصيف ..وكلها شهرين ..خليهم .. خالد ــ تحاططنا كلنا علشان آجار هالشقة ,.ثلاثة ألاف وخمسمية في الشهر تصدقين؟؟ والشقة بس ثلاث غرف وصالة وحمام تكرمين واحد ..والفرش مو لي هناك...عادي .. دانه ـ وايد ..كل هذا علشاني؟ حسن ــ لا تنغرين كانوا يبون سبب ييون جنب البحر وتحججوا فيج ..بكره يخلونج تروحين السوق تتجهزين مع حريم خوانج ويستفردون في الشقة .. دانه ــ أتجهز؟؟ حمد ــ اييه مهرج عند مريم .. دانه ــ مهري؟؟ حمد ــ اييه مهرج .مية الف ريال . خالد ــ عمتي انتي تحبيني؟؟ دانه ــ لا ..ليش؟؟ خالد ــ اذا تحبيني سلفيني خمسين الف!! حمد ــ بدوا اللعانه ...لا تعطينهم ويه... **************** الاسبوع الثاني مر ...ودانه تتأقلم مع عيال اخوانها اللي كل شي عندهم وناسه حتى لاقعدوا متمللين يموتون من الضحك .. مريم عطتها نص المهر والنص الباقي حطته في البنك ..ودانه كل يوم تطلع لمده ثلاث ساعات للسوق مع مريم وقمر ... خالد ــ عمتي ...لحقي النتايج نزلت ... دانه ــ أمااانه؟؟ زين كم يبت؟؟ خالد ــ انا الحين على النت ..بس ابي رقم جلوسج.. دانه ــ هات انا اكتبه ابي اكون اول وحد اشوف النسبه . خلال دقابق صرخت الدانه صرخه عوده ... طل خالد على الاب توب ... خالد ــ واو .مبروك ...عمتي انتي من اصحاب التسعينات وحنا ولاندري؟؟ حمد ــ ليش الصراخ ؟؟ ركضت دانه و عانقت حمد... ــ يبت واحد وتسعين واثنين من عشره !!!!!!هههههههههههههههههههههههههههههههههههههههههههه ههههه خالد ــ سكنهم مساكنهم ..عمتي شفيج؟؟ انهبلتي؟؟ انتي مو اول ولا آخر وحده تيب هالنسبة؟؟ حمد ــ أيوه احلى غيره ..مبروك عمتي ,,,تستاهلين كل خير... دانه ــ الله يبارك في عمرك ..قمر ..شوف رقم قمر وبدور .. حمد ــ حافظة ارقامهم؟ دانه ــــ اييييه .. ******** ــ هذا هو العنوان ... ــ ما بدك تكتب بطاقه؟ ــ الا .. مسك بطاه وكتب عليها .. (( مبروك باين دروس الانجليزي يابت نتيجه )) كانت باقة ورود وايد حلوة .. كلها جوري ..حمرا ..ارفق معاها زجاجه عطر غالي ..وعلبة شوكلاه فاخره ..طالعها خالد للمرة الاخيرة ..وطلع بره المحل ..يمكن هالهدية تخفف عليه الشعور بالذنب اللي يواجهه تجاه دانه .. ****** الحفله الكبيرة اللي سووها العيال لعمتهم كانت لاتنسى ..كل واحد منهم اشترى لها هدية حتى مشعل وصالح ..وكانت ثلاثة ارباع هداياهم عطور وشغلات من داماس ... حلوة وراقية . ماكان حد حاضر غيرهم ..حتى بدور وقمر مايوا ..خصوصا ان نسبهم كانت بالمره قمر نسبتها واحد وسبعين ..وبدور تسع وستين ...امهم كانت زعلانه منهم وايد .. فسوت لهم عقاب شديد ... حمد ـ عمتي ..تلفون . دانه ــ من؟ حمد ــ ناس . انتبهت دانه لملامح حمد ..كانت جاده .. دانه ـ الو .. المتصل ــ مبروك .. دانه ــ الله يبارك فيك من معاي؟ اللي ذهل دانه انه صك التلفون في ويهها !!! التفت لحمد .. ــ من هذا؟؟ حمد ــ يعني مين ؟؟ مصطفى قمر؟؟ ولا كاظم الساهر؟؟ جواب حمد خلاها تندهش ..ــ ضاحي؟ حمد ــ اييه ... انا بروح ناطرينج توزعين الكيك اللي طرشه .. دانه ــ من طرشه؟ حمد ــ مصطفى قمر .. دانه ــ ضاحي طرش كيك لي؟ حمد ــ اييه ,,. سكتت دانه ..هالصوت الخشن لضاحي؟؟ ضاحي طرش كيك؟؟ شمعنى هالكلام؟؟ ياني غبية ..خلاص صرت زوجته اكيد واجب انه يبارك لي سواء كان يبيني ولا مايبيني ... راحت الصالة ...وانصدمت .. دانه ــ وااااو ... كان قالب كاتوه كبير على الطاوله ..ومكتوب عليه مبروك النجاح .. .. حسن ــ عمتي شدراه انج تحبين الفانيلا وماتحبين الشوكلاته؟؟ دانه ــ ما ادري .. خالد ــ شكلنا ظلمنا هالضاحي . ...صراحه استحي اطلع الكيك اللي يبته ..مايسوى شي جدام هالكيكه ,, دانه ــ بالعكس بالنسبه لي احسن من هالكيكة .. مشعل ــ عمتي الكيكه موب كريمه مثل كيك خالد ..الكيكه كلها عسكريم .. دانه ــ صج؟؟ شدراه اني احب العسكريم؟ خالد ــ احم احم.. دانه ــ اووه خالد . انت تحب العسكريم مثلي ..بس باكل من كيكتك قبل هالكيكه .. خالد ــ راضي بهالحكم ..يلا الكيكه لا تذوب يابها المحل بنفسه ..يلا .. دانه ــ لاتخربون شكلها ابي اخش لقمور وعبور منها .. حسن باشمئزاز ــ قمور وعبور؟؟ شو هذولا فيرانج ولا قطاوتج؟؟ دانه ـ وحده بنت عمك والثانية بنت خالي ..يعني خال ابوك ..ربعك الفيران والقرود .. حسن ــ أفاااا عيال عمي ..غلطت عليكم العمه .. مشعل ــ لا لا لا .. صالح ــ أنا ما اتحمل لالالالالال هيء هيء ..قلب تحطم ... دانه ــ بس صياح أخواتي ..ما تحمل دموعكم تهل .. حمد ــ دانه شالكلام؟ حمد ومشعل رياييل .. يللاا قصي الكيكه متنا يوع .. دانه ــ متوا يوع؟؟ الثلاجه فيها الدياي اللي سويتوه غدا وانا محد ..كلوه .. مشعل ــ كله دم وع ..طلع حمد ابن عمي مايعرف يطبخ .. ******************* مشعل ــ لازم نصور ..قبل لا نقص الكيكه .. حمد ـ انا ما ابي اصور .. دانه ــ يلا ..أبيكم كلكم تصورون معاي ..ابي هالصورة علشان اكبرها ..وأحتفظ فيها .. وقفوا كلهم جدام الكيكه اللي يابها ضاحي ..مكتوب عليها مبروك النجاح ..والنسبه اللي يابتها .. . جهز حمد الكاميرا وركض يوقف معاهم... رن جرس الباب ..راح خالد يفتح ..ورجع ..انهبلت دانه على الباقه ..وعلى الهديه وعلبه الشوكلاته .. ويوم قرت البطاقة اضحكت ... حمد ــ من مين؟ دانه ــ ناس ..انت شعليك؟ لي ريل يحاسبني ... حسن ــ الله الله ...بدت تتكلم ..بدا اللسان ..بدا تأثير الريل ..هذا وهو بس طرش كيكه ... دانه ــ حسونه ترى والله سكت عنج وايد .. حسن مسك يد عمته بقوة ــ من حسونه؟؟ دانه ــ انا ..خلاص ..لاتعورني .. مشعل ــ طلعتي ديايه يا عمت ...شوفي سلمان ولا اهتم في حد وبياكل الكيكه كلها .. انقضوا العيال على الكيكه ومعاهم دانه هي تحب هالنوع من الكيك..تموت فيه .. ********* الحلقة السابعه ... *** ــ ما ابي أشتري .. مريم ــ تعالي لازم تشترين .. دانه ــ ما ابي .. مريم ــ وين رايحه؟؟ تعالي .. حاولت دانه تبعد قدر ما تقدر ..للحين ما تقبلت فكره زواجها ..وما اشترت الا اشياء بسيطه ..لكن مريم صدمتها لما يابتها عند هالمحل .. ركبت السيارة .. دخلت مريم ــ ليش ؟؟ دانه ــ ما ابي .. مريم ـ تبين اشتري لج انا على ذوقي؟ دانه ــ ما ابي شي ..ما ابي . وياويلج اذا اشتريتي شي .. مريم ــ انتي هبله؟ دانه ــ راجو ..امشي البيت .. مريم ــ لا والله انج مو صاحيه ..راجو مر الخياط .. دانه ــ اي خياط؟ مريم ــ ماتبين فستان عرس بعد؟؟ شرايج؟؟ دانه ــ ما ابي .. مريم ــ عن الخبال ..ماباقي شي على العرس ..اقل من شهرين .. انتفضت دانه ... مريم ــ ماتبين تخيطين فستان عرس؟؟ دانه ــ ما ابي .. هالعرس ما ابيه .. مريم ــ دانه .. ما مسكت دانه دموعها ..تحاول تنسى لكن كل شي يذكرها فيه .. اقل من شهرين ويزفونها لضاحي ..من ضاحي هذا؟؟ ما تدري .. مريم ــ تبين تأجرين فستان؟ دانه ـ ما أبي .. مريم ـ دانه ..البنت مو كل يوم تعرس ..على الاقل اذا الريل مو نفس مزاجج ..على الاقل اطلعي في عرسج أحلى عروس ..علشان نفسج ..عرسج مثل ما سمعت بيكون فخم .. المفروض فستانج وشكلج يكون فخم ..انت استانسي بنفسج ..مو كل يوم تعرسين ... دانه ــ خلاص ابيه آجار .. مريم ــ آجار؟؟ داته ـ ابي أشتريه من لبنان ..ما يهمني كم يكلف ..كلامج صحيح .بكره انا مسافره لبنان .. مريم ــ انتي صج انهبلتي من بيسافر معاج لبنان؟؟ ومن قال لج ريلج بيخليج تسافرين؟ دانه ــ وشدخله؟ مريم ــ ما تقدرين تسافرين بدون اذن منه .!! ******** دخلت الغرفة بعد ما لقت الكل في مباراه حاميه في السيجا .. طالعت تلفونها ...بتكلمه وتطلب منه ؟ ولا تخلي اخوها يكلمه؟؟ لحظه ليش اخوها؟؟ قمر يمكن تحل المشكله كلها .. اتصلت على قمر .. ــ هاي .. دانه ـ هايات ...وينج؟ قمر ــ كنت بزورج ..اتصل ابوي في الشقة واكتشف ان حشد من عيال عمي عندج .. وانتي محد ...عصب علي .. دانه ــ تشهدي .. لاتحسدينهم .. ضحكت قمر ــ لا اله الا الله ...شسوي ..مليت من الوحده اللي انا فيها .. دانه ــ وصلت بدور؟؟ قمر ــ لا ..ما بتيي لي شهر ثمانيه حق عرسج .. دانه ــ زين بنات خالتج عندهم اخوان؟ قمر ــ اييه ..بس في امريكا واستراليا يدرسون هناك .. دانه ـ تعالي لي اليوم بفضي الشقة ...بطردهم .. قمر ــ انشاءالله .. دانه ـ وابي منج شي ..اتصلي في خالج ..وقولي له ..اني ابي اسافر لبنان .. قمر ــ يالخاينه ..من وراي؟ دانه ــ بآخذج معاي ..أنتي ونايف ..بس خذي منه الاذن .. قمر ـ اليوم برد لج خبر ..بس ها ..فضي الشقة وجهزي القعده ..والشيشه .. دانه ــ ايييييش؟؟؟ قمر ــ أمزح .. جهزي القعده بيب معاي ليلى ..مسكينه متولهه تبي تشوفج.والله مشتاقة لج ..من متى ماشفتج؟؟ من كنتي في المستشفى .. دانه ــ حياها الله ..تعالي بعد الساعه سبع .. قمر ــ انشاءالله اصلي العشا وأييج .. باي .. دانه ــ باي . طلعت دانه الصاله ..طالعت الساعه ست ..المغرب .. دانه ــ احم احم ...بيوني ضيوف بعد شوي ..ممكن تفضون الشقة ..وياليت تنظفون الحوسه اللي مسوينها .. حسن ــ عمتي حنا الحين في خضم مباراه هامه ..تقدرين تقدمين طلب للديوان ..وراجعينا خلال ثلاثة ايام .. دانه ــ هيه ..الساعه سبع بيوني ضيوف! سلمان ــ بناااات؟؟ أحلى ضيوف ... خالد ـ احلى أحلى ..كم وحده؟؟ دانه ـ عن المصاخه عيال اخواني المحترمين ..يلا ..ابي أرتب البيت .. حسن ــ لا يكون قطاوتج قمور وعبور ؟؟ دانه ــ زين ذكرتوني اعزم عبو...وانتوا شدخلكم ؟ بدخل اكلم تلفون واطلع ...واتمنى اكم تفضون الصاله! دخلت دانه وكلمت قمر وطلبت منها انها تمر عبير وتيبها .. ــ أدري انج متشققه الحين .. قمر ــ متشققه وبس؟؟ آآآآآه على الاقل اراوي ليلوه خالد ..علشان تعذرني . دانه ــ خلاص لا تطولين عندهم ..يلا باي .. طلعت دانه للصاله ..ولقتهم كلهم مثل ما هم ماحركوا شعره .. ******************* عبير ــ صدقني خالد ..أكيد بتكون الشقة فاضيه .. خالد ــ مو وارد .. رجعت عبير للتلفون .. عبير ـ خلاص قمر ..لاتمريني .. تمرها؟؟ يعني قمر بتيي هنا؟؟ خالد ــ خلاص روحي .. قولي لها تمرج .. ابتسمت عبير ...وقالت ــ سمعتي؟؟ وبعدين ضحكت وصكت التلفون .. خالد ــ شقالت لج خلاج تضحكين؟ عبير ــ شي .. خالد ــ ترى ماتروحين لو ماقلتي... عبير ــ اوو ..وتبتزني؟؟ مافيها شي اتصل فيها واقول لها لاتمرين .. خالد ــ تتذاكين؟؟ عبير ــ لاء ...وأنا أقدر؟ راحت عبير لغرفتها تجهز نفسها ..وخالد ظل متحير شقالت قمر خلى عبير تضحك؟؟ ******************* حمد ــ خذي ..يبت لج الحلويات ..سويتي قهوه ؟؟ دانه ــ اييه سويت ..مشكور تسلم لي يالغالي .. حمد ــ شدعوه عمتي .. طلبت لج عشا ..بيبه راجو الساعه تسع ونص .. دانه ــ حمود ..يعل عيني ما تبجيك ..تسلم لي ما ادري شلون بطلع من يزاك. والله بس تسهل اموري ...بدور لك أحلى زوجه .. حمد ــ ياليت . عن اذنج ..مشعل داخل ولا طلع؟؟ دانه ــ طلع مع الكل ..تلاقيهم في الشاليه مال رفيجهم ..يقولون قريب من هنا . حمد ـ اعرفه ,, تبين شي؟؟ دانه ــ لا .يسلم راسك ما بي شي .. حمد ــ في أمان الله .. دانه ــ الله معاك .. ******************* وصلت سيارة قمر ,,, خالد طل من الدريشه .. نزلت قمر ..وما كانت حاطه غشوه على ويهها ..ونزلت ليلى وظلوا واقفين في الحديقه .. كانت قمر عاجبه خالد وايد ...جمالها في نظره فريد ..بس للاسف ماله ويهه يطلب يدها هالسنه لانه متحجج لناصر انه ما عنده استعداد للعرس شيكون موقفهم منه لاخطب قمر ؟؟ على الاقل ينطر سته اشهر .. عبير ــ على الاقل قلط البنات ..مخليهم واقفين بره ..بس تطالع ؟؟ خالد ــ ما طقوا الباب ...يعني ما بيدخلون ..وحركتهم هاذي مكشوفه ..هم يبون يسولفون ..يمكن يحشون فيج .. عبير ــ يحشون فيني؟؟ انت صاير لعقلك شي؟؟ شدراك ..يمكن يحشون فيك. خالد ــ احسن انج تطعلين لهم ..قبل لا اكنسل روحتج .. عبير ــ زين سلفني فلوس ..ما هديت دندون شي .. خالد ــ خذي هذي ثلاثمية ريال ..مافي غيرهم ... عبير ــ يمشي الحال ..باي ..وبس عن مطالعه خلق الله .. ********* قمر ــ وافق ..بس بشرط ..ماتطولين عن اسبوعين .. دانه ــ صحيح؟؟ الحمدالله ..توقعته مايوافق .. قمر ــ هو صراحه في البدايه ما وافق ..بس بركات بنت اخوج أقنعته..وقلت له اني وابوي بنسافر معاج .ترد بس وافق ..وقلت لبوي وقال ان التذاكر بتكون عليه ..بس ما بيسافر معاج ..بيسافر اي حد من اعمامي الباقيين لان امي على وشك ولاده .. دانه ــ هالتفاصيل موب الحين ..خلينا نطلع لليلى ..ونستانس ... ***********
|
#24
|
||||
|
||||
!!*!!.. الحلقــــــة الثامنــــة ..!!*!!
ليلى ــ أمانه دانه ..ششعورج بعد ما أصبحت حرم ضاحي؟ الدانه ــ شعوري اني خلاص انتهيت ..دانه بنت حسن اللي تعرفونها خلاص ..انتهت .. قمر ــ اكيد بتبدأ دانه الزوجه ..البنت وصارت مدام .. شناوية تشترين فستان العرس ؟؟ ششكله موديله؟ دانه ــ ما خططت للحين ..بشوف وأختار اللي يعجبني .. ليلى ـ معقوله ما كان عندج أحلام لليله العمر؟ دانه ــ هذي الفاضيه المدللله اللي عندها هالاحلام . انا كان وقتي متوزع بين عيال اخواني فما فكرت بهالزواج ابدا .. قمر ــ صراحه ..أنا أعتبر عمتي القود ماذر ...الام الروحيه لنا ..لانها هي الوحيده اللي وقفت معانا في قمه احتياجاتنا . دانه ـ لا هالكلام كبير ..انا مثل ما قال ناصر ..كنت اؤدي دوري كعمه . التفت دانه لعبير ..اللي كانت ساكته وما تعلق .. دانه ـ عبير ليش ساكته ؟ حتى ما كليت ولاشربتي شي .. عبير ــ ما في شي ..اسمعكم ..بس . دانه ــ لا ويهج يقول شي ثاني .. ليلى ــ صحيح في السياره كنتي تتكلمين ..شاللي خلاج تسكتين؟ عبير ـ اسمع كلامكم بس ... ****************** كان واقف عند الباب ..نزلت قمر مع عبير ..وسلمت عليها ..ورجعت اركبت السياره ..دخلت عبير البيت وهي مكتئبه .. خالد ــ شلون كانت الزياره؟؟ عبير ــ بس تأكدت من شي واحد .. خالد ــ وشو هالشي؟؟ عبير ــ انا أكرهك ... ركضت عبير لغرفتها ودموعها في عيونها . فكر خالد .. (( كملت ...فوق ان امي وأبوي ولا مفتكرين فيني ..أطلع وأدخل ..ولا حد داري عني .. عبير الحين تكرهني وهي الشخص الوحيد اللي كان عادي معاي ؟؟حتى اخواتي جافات في معاملتي ..أحسن لي اني اطلع من هالبيت .. قبل لا أختنق من السكوت والتوتر ..)) حط ثيابه وأغراضه في شنطه ..صغيره ..ملابس تكفيه اسبوع ..وطلع بره غرفته..كانت امه في الصاله وبيدها كتاب تقرأ فيه .. خالد ــ يمه .. انا بتم عند صديقي كم ليله ..لا حد يحاتيني .. ام خالد ــ .............................. خالد ــ مع السلامه يمه ... ام خالد ولا رفعت راسها من الكتاب وقلبت الصفحه ...خالد حس بحرج (( اروح بلا احراجات .))..وطلع من البيت .. عاد أي صديق هذا؟؟ خالد ما يعرف حد من ربعه ساكن لحاله ..ربعه فهد ومناحي متزوجين ..بيتم في فندق ..لين ما يلاقي شقة أجار .. ********** حمد ـــ دانه..دانه ..تعالي .. دانه ــ نعم .. حمد ــ بتسافرين بروحج؟ دانه ــ اسبوعين بس ..للبنان .. حمد ــ من بيسافر معاج؟؟ دانه ــ قمر .. وما ادري من اللي بيرافقنا من اخواني نايف اعتذر ان زوجته بشهورها الاخيره .. حمد ــ أنا أسافر معاج .. دانه ــ يعني ما بتنحرج من قمر؟ حمد ــ قمر ماراح تسافر ..خل تستحي على ويهها .. دانه ـ وأنت شحارك؟؟ قمر ابوها مرخصها تسافر مع عمتها .. حمد ــ انا بروح وياج ..وهي خليها في بيت ابوها ..وخلاص . دانه ــ حمد ..اذا تعزني خليها ارجوك ..انا محتاجتها معاي .. حمد ــ بيكون شكلها غلط اذا سافرت معانا .. دانه ــ حمد ,,أنا مو كل يوم اسافر ..على الأقل لبي لي هالطلب . حمد ــ بشرط!! دانه ــ وتتشرط؟؟ قول ششرطك؟ حمد ــ انا ادفع التذاكر .. دانه ــ لا ..كافي الشقه أجرتها لي .. حمد ــ خلاص قمر ما تسافر .. دانه ــ أحسن ..ولا تدفع أنت .. حمد ــ وانا ما ني مسافر .. دانه ــ لا حمد ..أنا ما ابي حد من اخواني اتضايق لا شفتهم ..احسهم السبب في تدمير حياتي .. حمد ــ خلاص ..أنا أدفع .. دانه ــ خلاص ..تدفع تذكرتك وأنا أدفع تذكرة قمر وتذكرتي .. حمد ــ الثلاث تذاكر على حسابي ولا ..مافي .. تنهدت الدانه .. ــ ليش؟ أنا ما أبي أكلف عليك ..كافي الحفله مالت نجاحي ..وتأجيير الشقه ..ووالهدايا ..كافي ما أبي أثقل عليك . حمد ــ أبي أفرح فيج ..خواتي صغار ومافي زواج لين عشر سنوات على الأقل ..وأنا مأجل الفكره لين سنتين يايين ..وأخواني للحين ماخلصوا الجامعه ..على طاري الجامعه .. ممتى بتقدمين؟ دانه ــ بعد العرس على ما اعتقد .. حمد ــ لما ترجين من السفر قدمي على طول ..بس اي تخصص بتدخلين؟ دانه ــ ما ادري شكلي ادارة واقتصاد . حمد ــ يو الخبول .. الشباب ــ السلام عليكم .. حمد +دانه ــ وعليكم السلام . سلمان ــ شفيكم يالسين متحنطين كأن على رؤوسكم الطير ؟ حسن ــ سلمان ..ليش قاطعت اجتماع الامم المتحده ؟؟ سلمان ــ اووه ..لا ..قررتوا تحرير فلسطين ؟؟ أخيرا ؟؟ قررتوا ان تتحدوا؟؟ الى الامام ..سر ... حسن ـ هذا ين وقعد .سلوم ...شسالفتك؟ مشعل ـ والله اثنينكم ينيتوا ..ما فهمت ولا كلمه.... سلمان ــ هذي خطط للمستقبل .. دانه ــ أراجوز؟؟؟ سلمان ــ اراجوز في عينج ..انشاء الله ممثل عظييييم .. دانه ــ خيبه ..ممثل؟ حسن ــ عمتي بكره عازمج على العشا .. صالح ــ والباقين مالهم رب؟ حسن ــ كل واحد يدفع عن نفسه ..مالي شغل فيكم ..امس عشيتكم على حسابي ..وعمتي بكره .. دانه ــ أنا بكره بسافر . صالح ــ وين؟ دانه ــ لبنان ..أسبوعين تسوق .... صالح ــ اسبوعين.؟؟ مع مين . حمد ــ معاي ..وممنوع المرافقين .. مشعل ــ وليش انشاءالله ..لبنان .. وبروحكم؟ انا معاكم . سلمان ــ انا بعد ..لبنان؟ وااااو ..أكيد البنات الحين في عز الصيف كله على البحر ... حسن ــ واو ..وينك يا خالد .. خالد دخل في نفس اللحظه .. خالد ــ سمعتكم تطرون اسمي . حسن ــ العمه تبي تسافر لبنان .. خالد ــ أووووووووووووووووووووووووووو . شالتطور؟؟ انا بسافر أول واحد ...مكن اشوف هيفا ولا اليسا على البحر .. دانه ــ عوووووووذه ..وش فيكم ميتين على البحر .. ضحك صالح ــ من صجج عمتي ما تدرين شيقصدون؟ دانه ــ يقصدون؟ مشعل ــ يبون يشوفون البكيني والمايوهات .. دانه ــ خييييييييييييييييييييييييييييييييييييبه ..قوموا ..قوموا ..محد رايح معاي لبنان ..قوموا العن اليوم اللي شفتكم فيه ... حسن ــ حنا شفناج ..قبل لاتشوفينا .. حمد ــ عنبوا الذاكره ما بينك وبينها الا كم سنه ..كم كان عمرك سنتين؟ حسن ــ مايهم اذكر ولالا ...بس انا شفتها قبل ..صح ولا لا؟؟ حمد ـ يمكن هي شافتك اول؟؟ حسن ـ لا كانت مسكره عيونها .. حمد ــ ليش ما تكون انت اللي مسكر عيونك ؟؟ طبعا الكل كان يراقب حمد وحسن في اهتمام ..يبون يشوفون وين بتنتهي هالمحادثه لسخيفه .. خالد ــ المهم ..يا عباقره ..انا اللي بسافر .. *************** يتقلب في فراشه وهو ملان..وين يروح هالحزه وهو عنده دوام الصبح ؟؟ فتح شنطته وطلع ملفاته ..وكان بينهم ملف اسود ..ملف دانه ..تذكره ..كان بيرده لها ..بس هو ما قرأ منه الا ورقتين بس ..فتح الملف ..ولف عن الصفحات الاولى ...لقى قسم ..مكتوب عليه كلمه سيدي .. (( سيدي ..كف عن ايذائي . .فلست سوى جلاد امره القدر باقصاء رأسي ..)) * من صار اللي صار ..وأنا تفكيري كله فيك انت ..صرت شغلي الشاغل ..ما اعرف شسوي ..شلون اتصرف ..انا ما اكن لك اي موده ...يمكن في ..بس الكرامه فوق كل شي... ..ماعدا امي ..امي الوحيده اللي فوق كرامتي ..وهذا يعني ..* ما كملت دانه الكتابه ..احتار خالد ...من تقصد؟؟ وليش؟؟ شالسالفه؟؟ قلب الصفحه .. (( سيدي ... حاولت نسيان ماضيك ...وحاولت تذكر حاضرك .. فكان الماضي اقوى من أن ينسى .. والحاضر اضعف من ان يبقى ... فتبا لمستقبلك الذي حاولت اغرائي به ...)) * لا ..لا ..مستحيل بعد اللي شفته اليوم اغير قراري .. شفت انسان اناني ..هالانسان بيحطمني يمه اليوم ولا بكره .. على الاقل ..بيحطم شي فينني . احتار خالد ..عن مين تتكلم دانه؟؟ من هذا اللي واثقه انه بيحطمها؟؟ معقول في حياتها حد؟؟ قلب الصفحه ..وكانت ممزعه ومقطعه وبعدين لصقتها دانه ببعض .. كانت رساله .. (( اليك ..نهاري ..وليلي .يومي ..وأمسي ..اسبوعي ..وشهري ..لك كل ايام عمري ,,,بعتها لك ..مقابل نظره من عينيك اشعر خلالها باسمى المشاعر تغزو قلبي ..وأجمل الاحاسيس ..تسري في جسدي )) وتحته كتب (( وصلتني رساله ..مليئه بعذب الكلام ..لكن الصدمه ان من وقعها لم يكن انت ..ولم يقصد ان يرسلها إلي .. فتساءلت ...متى ستخطئ انت وترسل مثيلتها إليَ؟؟ )) ما فهم خالد .. في الاوراق اللي قبل كتبت انها مب مهتمه ..والحين تكتب انها تمنى؟؟ يمكن هذي خواطر ما تقصد بها احد ..قلب الصفحه .. (( كرهت وحقدت ثم نسيت .... ثم عدت فعشقت من نسيت ...)) * اكتشفت اني احبه ..لا كلمه الحب قويه ..يمكن الفت وجوده ..تعودت وتفكيري اليومي انه جزء من حياتي سواء في الماضي ولا الحاضر ولا المستقبل عودني على تقبله ...بالمنطق ..شخص افكر فيه 22ساعه في اليوم ..ما أألف وجوده في حياتي؟ ما أحبه|؟؟ بس ..ضروري اني ما أتعلق بهالحب ..علشان ماتبان خيبتي قدام احد ..وما يبان انكساري ..اللي في قلبي ملك لي ..ولهالأوراق ..وهذا عهد بيني وبينها ...انا احبك ..يا ...... بس ..حبك للحين ما استقر في قلبي .بيظل دايم متشتت ..لين أعرف نهايه هالحال .. _ عصب خالد وايد ..ليش ما اذكرت اسم؟؟ من هذا اللي في حياتها ؟؟ يمكن الاوراق تكشف له الحقيقه ..بس هو حاليا تعب من القراءه ..وعنده دوام بكره..بيكم بكره ..دس الملف بين الملفات ..بيقرأه بكره في الاستراحه .. ********* تكره الطياره ...حمد واقف جنبها ..وقمر محتره واقف وراهم ... قمر تهمس ــ عمتي عمتي .. لفت لها الدانه ـ لبيه ؟؟ قمر ـ تعالي ,, ارجعت دانه خطوتين ورى ..ــ شو؟؟ قمر ــ ابن خوج هذا اللي ما يستحي ..ليش مو عادني موجوده ؟؟ دانه ــ مافهمت ؟؟ شتبين منه ؟؟ قمر ــ يعطيني ويه ..مايخليني كأني الخداامه امشي وراكم ... دانه ــ حطي غشوه على ويهج ..ما يعاملج جي ... اكيد مستحي منج على كثر الميكياج اللي في ويهج ..الله يهداج .. قمر ــ حنا رايحين لبنان ..وهالشي عادي .. دانه ــ عادي ؟؟ تحطين مكياج سهره احمر ..عادي؟؟ لفي ويهج بالشيله ..تراه ساكت لان نايف اخوي واقف ..ولا علمج الاصول عدل .. حطت قمر الغشوه على ويهها .. دانه ــ لاركبنا الطياره روحي الحمام ومشيه .. حمد ــ وين أوراقكم؟؟ وجوازاتكم ؟ طلعت قمر اوراقها ودانه نفس الشي ..لفت قمر وسوت باي لابوها .. حمد ــ هيه ..انتي ..لمن تأشرين؟؟ قمر ــ وأنت شعليك ..مالك خص . عصب حمد ..تدخلت دانه ــ قالت باي لنايف ..عمك شفيك صاير جبريت .. سكت حمد ..ولف ويهه ... خلصوا الاجراءات ..وركبوا الطياره ..حمد قدامهم .,..وهم يلا يلحقون على خطواته السريعه .. اجلسوا ..كان حمد على الطرف ..وبعدين دانه وقمر داخل .. دانه كانت خايفه موت ...كانت ماتقدر تتنفس ..أول مره تسافر بالطياره ..سافرت مره عمره مع امها بالسياره .. دانه ــ حمد لا طاحت الطياره ..وأنقذوك ..انت او قمور ..عط خالد مهري ..اوكي ؟؟ قمر ــ خالد ؟؟ ليش خالد؟؟ دكتور وما عليه قصور .. كانت قمر تتكلم بغيره ..وحمد تحولت نظراته ناريه ..صححت دانه .. ــ خالد ولد أخوي نايف ..موب ولد خالي ...صج خبله .. حمد ــ ليش واثقه انهم بينقذوني ؟؟ ليش ما ينقذونج وأنا أموت .. دانه ــ اسم الله على عمرك ..أنا ولا انت انشاءالله ..بس انا اعرف حظي ردي ...فما بيساعدني ... حمد ــ شالكلام ..كوني متفائله ...تفائلوا بالخير تجدوه ..شفيج عمتي ..يلا الحين الاقلاع ..تأكدي من الحزام ... انتفضت دانه .,..وحست بكل ذرات جسمها تتراقص ..مسك حمد يدها ..ومسكت قمر يدها الثانيه .. قمر ــ عمتي ,...لو هالرحله بصاروخ شصار فيج؟؟ الرحله انشاءالله سهله ..بس بتحسين بدوخه بسيطه من الضغط ..وحتى بعض الاحيان ما بتلاحظين .. حمد ساكت ما علق .. دانه ــ يا ساتر .. اقلعت الطياره وقلب دانه اقلع معاها ..حست بدوخه ..ولوعه ..كانت ترتجف ...المضيفه لاحظت هالخوف عند دانه وارتجافها وشحوب ويهها يابت لها عصير برتقال .. ــ خذي ..البرتقال منيح .. كانت قمر متغشيه ..ودانه نزلت الغشوه ..بس ويهها مافيه اي مساحيق تجميل ..عكس قمر .. بعد ربع ساعه . همست دانه ــ قمر قومي للحمام ومشي هالمصايب من على وجهج .. قمر ــ ليش عمتي مو حلوه؟؟ دانه ــ بالعكس طالعه جنان ..بس ولد عمج مايحب هالحركات ..قومي .. قامت قمر ..ومشت قدام دانه ..وبعدين قدام حمد اللي كتم نفسه .. حمد ــ اوف ...حاطه غرشه العطر كلها؟ هذا بنت اخوج لاحيا ولا مستحى . دانه ــ بس ..عن العياره ..عطرها عادي .. حمد ــ شفيج ماسكه مسند الكرسي جي؟؟ دانه لاطحتي ما بينفعج التمسك ..بيطيح الكرسي معاج .. ******************************* الحلقه الثامنه ... ***** دكتور فارس ــ مره ثانيه أثبت براعتك يا خالد ... خالد ــ هذا واجبي كطبيب .. هز الدكتور فارس راسه بلا .. خالد ــ مجرد حاله انقذتها من التدهور ..واجب كل طبيب .. فارس ــ كل ما يالك ,.,,وتكبر أكثر في عيني ...عن اذنك .. خالد انقذ حاله طفل سوى حادث انكسر فيه ضلع ولا حد كان داري ..ويا يموت من ثقب في رئته ..بس خالد كان موجود ..الله لطف في هالطفل ... خالد محد يحبه في المستشفى ..لانه مغرور ..ومتعجرف ..وماعنده دبلوماسيه ولاعنده مجاملات ..وزملاءه في القسم يتحاشون يتكلمون معاه .علشان ما يفشلهم ..بس غير هذا رغم صغر سنه اثبت كفاءته ..وعبقريته .. دخل مكتبه ولقى الدكتوره مها .. خالد ــ السلام عليكم .. مها ــ وعليكم السلام ..شحالك دكتور خالد؟ خالد ــ حالي ممتاز ..وحالج؟ مها ــ زين ماشي الحال ..ولو أعرج .. حس خالد انها مرتبكه .. خالد ــ شلون أخدمج .. مها ــ سمعت ان وقتك فاضي ..وسمعت انك تقدر تشيل اكثر من شفت .. ابتسم خالد ..هي مرتين مره ساعد دكتورة هيام والمره الثانيه لما ترقدت الدانه ..أه يالدانه .. ــ اقدر اساعدج .. مها ــ رفضت الاداره تعطيني بكره اجازه ..وأنا مضطره اسافر ..محد يغطي مكاني ..انا مستعده لو تبي اشيل عنك الشفت لما ارجع ... سكتت ...وما زادت ..واللبيب من الاشاره يفهم ليش تحرج نفسها؟؟ خالد ــ انا بكره اجازه ..وما كان عندي اي خطط .. للاجازه ..مستعد اغطي مكانج .. ابتسمت مها ــ ما .. خالد ـ وما أحب حد يناوب عني ..فاعتبري الامر خدمه مجانيه ..تفضلي .. مها ــ شكرا .. الدكتوره مها تقريبا من عمر خالد ..وتوظفوا في وقت واحد .. مسك ملف الدانه ...عنده استراحه نص ساعه ... راح الكافتيريا ..وخذله كوفي ودونت ...فتح الملف ..وكمل قراءه ... (( أمنيه ..كل ما ابي من هالدنيا ..شي واحد ..أنها لا تجرحني ..)) ** شفت عبير اليوم ..وقالت لي انه ما في خبر عنه ..سنتين وأنا احاتي ...ولما ماتت امي مالقيته جنبي ...شلون بيكون زوجي وريلي ..وهو ما وقف معاي في اقوى طيحاتي ..اتذكر لما يا المستشفى يوم طاحت امي اول مره ..كرهته ..كرهته .. بس اليوم هالشعور انعكس .. ابيه يرجع مثل قبل ..ابي اكرهه ..ما ابي ابين ضعفي جدام احد ..كرهي له هو السلاح اخبي هالمشاعر الكريهه ,,, تيبس خالد . .((أنــــــا؟؟؟ دانه كانت تحبني أنـــا؟ ..بس يوم كنت اشوفها كان الكره في عيونها لي ..انا متأكد ... هذا كره ماهو حب ..يا ترى شمخبيته زياده في هالاوراق ؟؟ )) ــ الكرسي فاضي؟؟ رفع خالد راسه ..دكتور فارس يكلمه ..صك الملف وحطه على جنب وشال اغراضه من على الكرسي ..ــ ولو ..حتى لو محجوز يفضى لك .. فارس ــ شكرا . ما في مكان ..قلت ايلس وياك .. خالد ــ وأنا أفتخر ..تفضل ... فارس ــ اذا ما في تطفل ..شاللي خلاك مندمج وايد ..ولا شفتني ايي قربك وخلاك ما تقرب من قهوتك ؟ خالد ـ هو ما في تطفل ..بس كنت أقرأ شي خاص .. فارس ــ رساله من معجبه مثلا؟ خالد ــ ههههه .معجبه مرة وحده؟ لا .. ما وصلتنا رسايل .. بس اكيد وصلتك انت؟؟ فارس ــ المدام هي المستلمه البريد ...وهي تسوي فلتر .. خالد ــ لا ..على جذي ودع رسائل الحريم كلها .. فارس ــ على قولتك ..اتصلت فيك امس ما حصلتك في البيت .. خالد ــ ما تصلت على الجوال ؟؟ فارس ــ مغلق .. خالد ــ حاليا انا في الكونتنتال .. فارس ــ فندق؟؟ لا يكون عرست ؟؟ خالد ــ لا ..ما عرست ... العرس يبي له طوله بال ... فارس ــ بتشيل بكره الشفت؟. خالد ــ ايه ..دكتوره مها مضطره ..وانا ما عندي خطط .. فارس ــ قالت لي دكتوره مها انك سويت معروف معاها ..وانك غير كل اطباء القسم ..صج هم لطيفين ومجاملين بس مستحيل حد منهم يتخلى عن راحته او اجازته ...ما اقصد اي اهانه ,, خالد ــ بالعكس ما في اهانه ..انا كدكتور انسان صريح ..مع مرضاي انسان متعاطف ..بس ما احب المجاملات المزيفه ..هذا كل شي . فارس ــ نرجع لسالفه العرس ..متى ناوي؟ خالد ــ ما ادري يمكن خلال هالسنه .. ****************************** قمر ــ ليش ما يعزمنا على ريوق ؟؟ دانه ــ شريوقه ..الساعه 12 الظهر ..المفروض غدا .. قمر ـ غدا ريوق سم ..ما يقول لنا يوعانين ولا لا؟؟ انا بطني تصارخ .. دانه ــ تونا في الطياره زاطين كروسون وسندويشات ..متى يعتي بهالسرعه .. قمر ـ عمتي ..بروح اشتري لي وجبه من هالمطعم .. دانه ــ ايلسي مكانج ..حمد ما يحب هالاشياء ..تروحين وتيين بروحج ما يحب .. قمر ــ زين بيحكرنا ؟؟ حنا في لبنان .. دانه ـ ما يينا سياحه يينا تسوق ..غير الاسواق لاتشوف عينج ..حركي . يا حمد مع التكسي .. حمد ــ الحين نروح الشقه .. قمر ـ شقه؟؟ ما بنيلس في فندق ؟؟ حمد ــ عمي ثامر عطاني مفاتيح شقته هنا ..شاللي مو عايبج؟ قمر ـ من بينظف ويكنس ؟ حمد ــ انتي !! وعمتج ..يلا ...بلا دلع ماصخ .. دانه ــ ثامر عنده شقه هنا؟ حمد ــ أنا مثلج ما كنت اعرف ..كنسلت الحجز لما ياني وقال لي ايلسوا فيها وارتاحو .. قمر ـ عمتي ..الفندق اريح .. دانه ــ حمد شرايك نيلس في فندق لين نرتب الشقه؟؟ حمد ــ الشقه مرتبه وجاهزه ..(التفت لقمر ) هي انتي ..بلا دلع ولا طرشتج الحين لبوج .. دانه ــ حمد .. حمد ــ يلا عمتي .,, ركبت قمر .. دانه تهمس لحمد ــ تدري مدللله ما تعرف للتنظيف والطباخ ..لاتصرخ عليها جي .. حمد ــ لايعه جبدي منها من شفتها في المطار ..ما اتحمل كلمه زياده ..وحاشمها علشانج والا كان صكيتها كف على ويهها .. ابتسمت دانه ..حمد بدوووووووي حيل ..وعنده الغلط غلط والصح صح ..وما يحب الدلع ولا يطيقه ... ركبت السياره وهمست لقمر ــ اذا ما تبين تنصكين كف على ويهج .لاتنطقين حرف . مدت قمر بوزها وهي معصبه ... *************** الشقه كانت وايد حلوه ..وفخمه واثاثها فخم .. ــ مساء الخير .أنا نادين ..مدبره البيت ..حمدالله على السلامه .. الكل ــ الله يسلمج .. نادين ــ اتصل فيني استاذ تامر وطلب مني اوفر سبل الراحه لحضرتكن ..تفضلوا ..الغرف والحمامات جاهزه .. دانه ــ شكرا .ياليت تجهزين لنا شي ينوكل .. نادين ــ جهزت لكن مقالي دجاج مع السلطات ورز..كغدا ,, التفت دانه لقمر اللي ويهها انصبغ من الاحراج .. دانه ـ أعتقد انحلت اسوأ مشاكلج ,, قمر هزت راسها بإي .. حمد ــ أنا ما أبي أكل ..بتسبح وأنام ..لحد يصحيني ..تصبحون على خير .. دخل حمد ... قمر ــ فكــــــــــــــــــــــــــــــــــــــــــــــــ ــــــــــــــه...ما بغى يحل ..أحسه كاتم على نفسي .. دانه ــ جب ..هذا حمود ...ماتتكلمين عنه جي ..سمعتي؟؟ قمر ــ حشى ولد اخوج ما يخلينا نتنفس مثل الناس .. دانه ــ حمد انسان سيدا سيدا ماعنده خرابيط آنسه قمر ..فكري بس بدكتورج اللي حاولت تسوين لنا مشكله بسبته .. قمر ــ ليش معصبه؟؟ دانه ــ اوووووه ..رايحه اتسبح .. قمر ــ وليش بالله تصارخون علي ..شسويت لكم ؟؟ انت وولد اخوج شايفين اعماركم ... لو أدري ماييت خير شر.... دخلت الغرفه وهي معصبه ...... ************** طبعا ..من عظم اللي عرفه نفسيته ساءت ..صار له ساعات في هالفندق .. ماكان يقدر يقرب من الملف ويكمله ...كره نفسه ... ********** اسبوع ...مر ..ودانه من محل لثاني ..ما دخل مزاجها شي .. قمر ــ ذكريني ما اسار معاج مره ثانيه ..زين ؟؟ دانه ـ انشاءالله ..شوفي هالمحل ... البايع ــ مرحبا ..كيف بدي اخدمكم؟؟ دانه ــ نبي نشوف فستان عرس .. البايع ــ عنا كل الماركات.. وكل بيوت الازياء والمصممين العالميين واللبنانيين ... دانه ـ بس بختار فستان اللي يعجبني ..وياليت لو في اشياء كلاسيك .. .. البايع ـ تحبي فرجيك كلل الفساتين .؟؟ دانه ــ افضل اشوف بنفسي .. البايع ــ اي شي تختاريه .. مدام ماري بتساعدك ..لغتها انجلش .. انا بكون في المكتب فوق .. راح وتكلم مع ماري ..وطلع فوق .. قمر ــ فساتينه عجيبه .. دانه ـ بس بسيطه ,,أنا أبي شي فخم كشخه تحسينه حلو ..وكشخه .. قمر ــ هذا وانتي ما تبين تعرسين ..لو راضيه عن هالعرس شتلبسين..؟؟ دانه ــ شي بسيط ..مثل هالفساتين ... قمر ــ منطق غريب .جوفي .حمد واقف لنا على بعد خطوتين .أحسه بأي لحظه بيقبض علينا .. دانه ــ حلو ..فيلم هندي حن ..الريال ما قصر معانا ...مخلينا على حريتنا .. قمر ــ أي حريه ما يخلينا نمشي خطوتين بروحنا .. دانه ــ قمر ..انا ما احب طريقه الحريه هذي ..زين من الريال يخاف علينا ويحمينا .. قمر ــ أنا ما تعودت .. دانه ــ ما عندج اخوان ..لهالسبب ما تعودت ..كنت تسافرين مع امج وبدور ..وتأخذون راحتكم مع بعض ..واخوي راخي لكم الحبل ..لكن حمد غير .. قمر ــ حمد غير حمد غير ..ذبحتيني ما ني طايقه اكمل هالاسبوع بسبته ..كله يرزل فيني ويصارخ علي ..ومعاج مثل الحمل الوديع ولا قد مره رفع صوته عليج ..هالفستان عجيب ... دانه ــ بس بسيط ..السبب انج كله متملله ومو طايقه حد ..وكأنه أقل من مستواج ..وأراهن ان حمد عنده نفس الشعور تجاهج ..تذكري ما عنده خوات كبار ..كل اللي عنده انا ..وانا انسانه عاديه غير متطلبه .. قمر ــ انصح بهالفستان ...لحظه ..أنا متطلبه؟؟ انا ماني متطلبه ..انصحج بهالفستان .. دانه ــ مو عاجبني ..هالفستان حلو ..واو ..بليز كان اتري ات . يات ماري وشالت الفستان عن المنيكان ...وأعطته دانه .. ــ ثير ان ثات روم .. دويو نيد اهلب؟ دانه ــ نو ,,ثانكس ..تعالي ساعديني فيه .. قمر ــ اوكي بس انا مو متطلبه .. انا مثلج عاديه ..انتي متأكده مقاسج؟؟ دانه ــ اعتقد ...تعالي ساعديني داخل ..طرحته تجنن ..واو الدانتيل عجيب .. قمر ــ لفستان عجيب .... الفستان كان الجزء العلوي دانتيل مع موديل الكورساج (المشد ) ومن تحت الجيبون وايد فخم وحلو وكبير .. وفيه ورد حلو .. كان بالضبط على مقاس دانه .. ــ ها ..شرايج .. قمر ــ وااااااااااااااااااااااااااااااااااااو ..روعه عليج ..يهبل ..تدرين ..أنا بآخذه ..خليني اجربه .. دانه ـ من صجج؟؟ قمر ــ اييه ..يمكن خلود يخطبني ..والبسه قريب .. ابتسمت دانه ــ يعني آخذه ؟؟ قمر ــ شوفي السعر .. دانه ــ سبعة آلاف دولار ....حلو وايد سعره ..خلاص اعتمد .. قمر احضنت عمتها وهي مستانسه ..لكن دانه كانت فرحتها بالفستان ..ماكانت بالعرس .. دانه ـ واو خلصنا من هم الفستان ... حمد ــ اشتريتيه؟ دانه ــ اييه ..بيطرشونه الدوحه انشاءالله هالاسبوع ..بيوصل قبلي .. دفعت لهم العربون ..والباقي لما يوصل الفستان ..سليم ومعافى .. حمد ــ أهم شي اعجبج .. دانه ــ يهبل صح قمر ؟ قمر كانت لافه ويهها بعيد..ــ ايه . حمد ــ نرجع الدوحه ..ولا نظل اسبوع ثاني؟؟ دانه ــ ودي تمشينا ..وتاخذنا وتيبنا ونستانس .. قمر ــ والسوق ؟؟ دانه ـ ما ابي شي ..هالاسبوع اشتريت اشياء وايد ..وأعتقد كفايه .. قمر ــ لا .... دانه ــ قمر ..أبي استانس .أبي اتمشى ,,, قمر ــ كيفج . ******************** من هالزائر؟ استغرب خالد .. نايف ــ السلام ولد الخال.. خالد ــ وعليكم السلام ..هلا ولد العمه ..وينك ما تنشاف ... نايف ــ هذي قويه ..على الاقل مو ساكن فندق ..بيتي معروف .. خالد ــ تدري ..الوالد زعلان علينا ..لانا فرطنا في بنت الاخت ..نايف .. تقدر تطلها من ضاحي ...وتزوجني اياها؟؟ نايف ــ علشان تطلقني مرتي بالمره ..لا خيروك واخترت ..واجهه اختيارك .. خالد ــ مي زعلانه ..تبي تزوجني حد من ريحه الغاليه عمتي ..وللاسف الفرصه الوحيده ..بح ..فركتها من يدي .. نايف ـ والحين ؟؟ خالي المسكين تعبان نفسيا ..يوم اسأله عنك يقول لي لاتيب طاريه ..متى بتراضيه؟؟ خالد ــ ما ادري شلون برضيه .. نايف ــ صار اسبوع ما كلمت امك ....دقت تشتكي لي من انانيتك .. خالد ـ شلون براضيهم ..وين بلاقي دانه ثانيه ..علشان يرضون عني ..كانوا يبون لي زوجه من ريحه المرحومه ..بس افرطت فيها بدون قصد لو ادري انها بتتزوج بهالسرعه ما رضيت .. نايف ــ دور لك حل ..أي شي .. تزوج على ذوقهم .. خالد ــ ما اعتقد في بنات قريبات من امي اكثر من دانه .. خلنا من سالفه الزواج ..تشرب ايش ؟؟ نايف ــ شربت شاي وانا انطرك ..وتعبت .. **************** دانه ـ كانت تقول امي انها لما كبر ثامر ..وكانوا كلهم اولاد اشتاقت انها تيب بنت ..فيابت نوير ..كبرت نوير ,,,كانت بنت بروحها في البيت ..فامي قالت تيب ..يمكن تطلع بنت تصير اخت لنوير ..ييت انا ..وكانت منيره زوجه نايف يابت البنات ..التوأم بعدها بفتره ..امي استانست ان العمه والبنات نفس العمر ..مات ابوي ..واخواني كلهم تزوجوا وانشغلوا بحياتهم ..وماظل لمي غيري ..حتى نوير عرست وهي صغيره الله يرحمها . ماكملت دراستها ماكانت تحب الدراسه.. عشت مع امي ..الله يرحمها .. لين ما الله اخذ امانته ..عمامج باعوا البيت العود ..وأنا تشتت ...ماغير نايف اللي حط ليغرفه في بيته ..بس .. قمر ـ عمتي ..لا تحطين في خاطرج منهم.. ابوي لما سالته ليش زوجوج بدون ماتشوفين وتعطين رايج .قال انه اصغر عمامي بينه وبينج عمر ..وعمامي يبون يسترون عليج..ما يبونج تشتتين ..وماكان في حل غير الزواج .. دانه ــ عذر ما يقنع حد ابد ...حتى اليهال .. قمر ــ زين عمتي ..امانه لا طلعنا خلي ولد اخوج يخف عني تعبت منه ..اسبوع وهو بس صراخ علي .. دانه ــ بحاول .. طلعت قمر لغرفتها ..وانسدحت دانه على السرير ..ابتسمت لما تذكرت كلمات صاحب محل التحف والهدايا .. ( عيونك الحلوين ليه فيهن حزن؟؟ شو مجوزينك غصب عنك؟؟ )) ضحكت ..حتى الغريب ...عرف شفيها ..وهو يمزح ...شهر وشي ..,وأكون في بيت ضاحب في غرفه ضاحي ..زوجه ضاحي ..وبعدين ام عيال ضاحي .وبعدين جده احفاد ضاحي ..ولما اموت ..أكون بس حرم الاستاذ ضاحي ...هالاسم وهالشخص ..بيحكموني لين آخر حياتي .. بس اذا كنت ذكيه ..يمكن انا اتحكم فيهم!!!!بس ما عندي الشجاعه للاسف .. ***********************************
|
#25
|
||||
|
||||
شكرا لمروركم على موضوعي وهذا شرف ووسام لي
|
#26
|
||||
|
||||
أشكركم جزيل الشكر على هذه الحلقات الجميلة والمشوّقة.
|
#27
|
||||
|
||||
مشكوووور الله يعطيك العافية....
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
راديو قصيمي نت | مطبخ قصيمي نت | قصص قصيمي نت | العاب قصيمي نت |